Cinîya bi nameyê Menîce Aykute, bi domananê xo wextê qedexeyê tebervejîyayîşê kuçeyan yê Geverî yê Colemêrgî de nizdîyê 20 rojan keyeyê xo nêteriknaye. Menîce Aykute derheqê çîyê ke cuyayî de qisey kerde.
Menîce Aykute va ‘wexto ke va qedexe dest pêkerd, merdimî tîya ra şîyî’ û wina domnaye: “Çimkî îlanê qedexeyî, ameyêne manaya îlanê şerî. Ez û 5 domanê xo keyeyê xo de menda. Ti kes nêkewtbi pey mal û milkî. Merg estbi û merdimî kewtbî pey xelasîya xo. Her şan vengê sîlehan ameyêne. Domanê mi ranêkewtêne. Vengê topan ver psîkolojîyê mi xira bîbî. Netîceyê her guleyî de merg estbi.”
Menîce Aykute dewamê qiseykerdişê xo de wina va: “Ez 20 rojan ra dima mecbûr menda bivejîya. Ma mîyanê çadirêk de mendî. Wexto ke qedexe qedîya û ma agêrayî, ma keyeyê xo nêşinasna. Her ca amebi veşnayene û rijnayene. Dêsan ser o nengî ameybî nuştene. Herçiqas ke 2 serrî derbaz bîyî zî, ma hîna çadire de cuyenî. Hem ma mexdur kerdî, hem zî seke henekê xo bikerî, pereyê kel-melê ke zirar dîyî, pereyê înan dayî. Ma nika bi îmkananê xo ban virazenî. Ez do nê zulmî qet xo vîra nêkera. Ma xo vîra bikerî zî domanê ma xo vîra nêkenî.”
JINNEWS / COLEMÊRG