Tecrîdo ke Rayberê Şarê Kurd Abdullah Ocalanî ser de yeno meşnayîş dewam keno, heto bîn ra muracatê keye, avukat û yê heyetî yenî astengkerdiş. Heto bîn ra çend rojî verê derheqê Ocalanî de tayê xeberê nêbaşî ameybî vilakerdiş. Nê xeberan ser ro Serdozgerîya Komare ya Bursaye îzehetêkî dabî.
Labelê şarê kurd û dostê ci nê îzehetî ra îkna nêbî; cok ra sere de Ewropa û cayanê cîya-cîyayan yê Kurdistanî de vejîyayî raşteyan û dest bi protestoyî kerdî. Babete ser o dayîkê şirnexijî qisey kerdî û vera nê xeber û tecrîdî de reaksîyon nîşan dayî. Dayîkî qiseykerdişê xo de qala polîtîkayê tewqîfkerdişî yê dewlete kerdî û dîyar kerdî ke ganî bi hawayo lez pêvînayîş bibo. Rayber azad nêbo, ma zî azad nêbenî
Dayîkan ra sifteyîn Ferîde Malgaze qisey kerde. Malgaze va ‘seba qedîyayîşê kaosî, ganî Ocalanî reyde pêvînayîşî bibî’ û wina dewam kerde: “Reyna ganî rayîrê azadîya Ocalanî bêro akerdiş. Heta ke Ocalan azad nêbo, ti kes azad nêbeno. Wazenî sebrê kurdan biceribnî. Wa wina nêkerî. Rayberîye seba ma xeta sure ya. Wa Rayberê ma serbest verabidî, ma sewbîna çîyêk nêwazenî. O rayberê Kurdistanî yo. Ma tena wazenî ke wa azade bibo. Ma çiqas vanî aştî, ê hende zîndanan pirr kenî. Ma nêwazenî gerîla û leşkerî bimirî. Ma azadî û heqê xo wazenî.”Şirnex û Silopî payan ser de yî
Malgaze dewamê qiseykerdişê xo de bale ante zext û zorê dewlete ser û wina va: “Herçiqas ke hende zext û tedayî estî, reyna zî şar payan ser de yo. Ê se bikerî zî ma do payan ser de bibî. Çi Cizîr, çi Silopî û çi zî Şirnex do qet nêkewî. Ma tîya de yî û ma do hertim baş bibî. Vera tecrîdî çi destê ma ra bêro ma do bikerî. Ma cinîyî do heta peynî xover bidî.”
Eke nêwazenî, wa pêvînayîşî bibî
Dayîkan ra Hayat Ucaye qisey kerde û wina va: “Ganî Ocalano ke xeta sûre ya şarê kurdî yo, serbest bêro veradayîş. Tecrîdo ke Ocalanî ser de yeno meşnayîş, heme şaran ser de yeno meşnayîş. Ma cinîyî do qet sere nêronî. Ê wazenî hêrs û sebrê şarê kurdî pêmawî. Ma cuyêka bêrayberîye qebul nêkenî û ma do nêkerî zî. Eke xeberêka xirabe bêro, heme kurdî û dostê înan werzîyenî payan ser. Eke ê nêwazenî çîyê sey 99î bêrî cuyayîş, ganî pêvînayîşî bibî. Seba aştîye ganî tecrîd bêro wedarnayîş û Ocalan azade bibo.Heta ke erey nêbîyo
Ucaye peynîya qiseykerdişê xo de qala wedarnayîşê tecrîdî kerde û wina va: “Kaos tecrîdî ver beno. Aştî zî ancax bi wedarnayîşê tecrîdî mumkin o. Heta ke erey nêbîyo, ganî Rayberîya ma reyde pêvînayîş bêro kerdiş û fikrê ey bêrî esasgirewtiş. Merdimî bêxera aştîye çîyêk nêwazenî. Labelê qetlîyam û zextê ke benî, nîşan danî ke ê aştîye nêwazenî. Ganî heta ke erey nêbîyo, Rayberîya ma reyde pêvînayîş bêro kerdiş.”
JINNEWS/ŞIRNEX