Gurekar û emegdarê Çapemeniya Azad şewa verî Stenbol de Meydanê Galatasaray de are bî û sereştişan protesto kerdî. Parlementer û rayveranê HDP ra pîya xêlê partîyanê sîyasî, sendîka, rêxistinê pîşeyî û hunermendî zî tewrê nûmayiş bî û aşkere kerdî ke Çapemenîya Azad do bêveng nêbo. Bado ke kêberê qenalanê televîzyon û radyoyan amey mor kerdiş gurekaranê çapemenî verê xo day Meydanê Galatasaray. Nûmayişkarê ke dowîzê ÎMC, Hayatin Sesî, TV 10 hewaday û eblûqaya polîsan ravêrnay, xo resnay meydanî vistî vîr ke iyê dê dîktaya yewvengî ra milê xo çewt nêkerê.
Mor panay vengê şarî
Rojnamegeran pankartê zey “Dest mede TV û radyoyê mi”, “Ma dê bîatê yewvengî nêkerê”, “Rewşa Îstîsnayî wedare, Qerarnameyê Hukmê Qanûnî betal bikerê” akerdî û sloganê zey “Çapemenîya Azad nîna bêvengkerdiş”, “Verra faşîzmî doş bi doş”, “Bêveng memane dor ê to ya”, “Heqê hayderîgirotişî nîno manîkerdiş” berz kerdî.
Serokê Pêroyî yê Sendîkaya Rojnamegerê Tirkîye Ûgûr Guçî nûmayiş de qisey kerd û aşkere kerd ke ti derbe û Rewşa Îstîsnayî nêşkena bikewo vernîya demokrasî. Guçî vist vîrî ke hikûmeta AKP wazena rojnamevantî biqedîno û wina dewam kerd; “Ewro radyo û televîzyonê vengê elewî, kurd, emegdar û bindestan gênê (padayenê). Ganî ma pêro pîya dûştê nayî vinderê.” Ûgûr Guçî îşaret kerd ke morê ke kêberê qenalanê TV û radyoyan amey vistiş esasî vengê şarî ra amey panîyayiş û aşkere kerd ke seba ke raştîyan biresnê şarî iyê dê heta peynî tekoşîna xo biramnê.
‘Roja tarî yê tarîxa çapemenî’
Serokê Pêroyî yê DÎSK Basin- Îşî Farûk Erenî zî da zonayene ke no welatî de çapemenî her tim bin zextan de ameya vistiş. Erenî vist vîrî ke homareke bêsînor rojnamegerî amey qetilkerden, rojname amey bombekerdiş, rojnamegerî amey girotiş. Erenî va, ‘La ti wext ma qasê ewro bin zextan de nêmendî. Arîf Koşar ke ser nameyê Hayatin Sesî qisey kerd zî vist vîrî ke 23 TV û radyo rîwalo ke vengê kurd, elewî, gurekar û emegdaran bî, hetê serdestîya AKP û Seray amey giroten. Koşarî va, ‘Ma dê bêzar nêbê, bêveng nêbê, yew şirê, hezar ageyrê.
koordînatorê weşana ÎMC TV Eyup Bûrçî zî da zonayen ke zey ÎMC TV înan verîya 5 serran dûştê çapemenîya bûrjûwa ya ‘yewperest nîjadperest, mîlîtarîst û dewletperest’ zey alternatîf destpa weşan kerdî. Bûrçî vist vîrî ke Kobanê ra heta Şengal, Cizîr ra heta Amed, Soma ra heta Artvîn vengê bindestan resna dinya û hayr ant wextê hewldayena derbe ke Meclîs ra tenya ÎMC TV weşana ganî kerd. Eyup Bûrçî aşkere kerd ke hewl danê ke bi bêvengkerdişê çapemeniya mûxalîf û otorîteyekê teqez bîro ronayene. Bûrçî va ma dê xover bidê, nêvindê û herayî bîrê.
Çapemenîya Azad bêveng nêbena!
Ser nameyê TV 10 zî Velî Haydar Guleçî qisey kerd û hayr ant azadîya îfade ser û va bi heayeke aşkere azadîya îfade yena binlingkerdiş. Guleçî vist vîrî ke Tirkîye polîtîkayê xo yê yewperestî, “yewvengî” zî kerd vêşêr û wina dewam kerd: “Wazenê 500 qenalan ra jew veng vejero, o zî vengê mûktedîr o. La ê nêşkenê vengê şarî vindernê.
Leyla Abay zî ser nameyê Ozgur Radyo qisey kerd û da zonayen ke 21 serrîyo vengê pêrokîn bindestan radyoyê xo ra resnay. Abay vist vîrî ke xêlê reynî ê raştê cezayan ameyê, gurekarê înan ameyê girotiş û va, ma ti wext bêveng nêmendî û ma dê bêveng nêmanê zî.” Parlamenterê HDP Erdal Ataşî zî aşkere kerd ke êriş rîwalê bêçarebîyayena îxtîdarî viraziyenê û va; “Rojê ke çapemenîya azad xeberanê azad virazo dûr nîyê.”
DÎHA/STENBOL
Faşîzmî peyser pijiqnime
Dûştê êrişanê verra çapemenî xêlê cayan de nûmayişê protestoyî virazîyay. Dersim de nûmayişa roja 26. yê maliman de, seba televîzyon û radyoyê ke amey giroten nûmayişa bêveng virazîya. Bi seyan kesê ke Çarşiyê Binerdî de amey têhet slogganê “Çapemenîya Azad nîna bêvengkerdiş” berz kerdî. Peycoy nîm seat seba protestokerdişê êrişanê verra çapemenî nûmayişê bêveng virazîya.
Enqera de zî rêxistinê emegî seba protestokerdişê qenalanê televîzyon û radyoyan amey têhet û vatî “Çapemenîya Azad nîna bêvengkerdiş.” Panqarta “Ma wayîrê heqê xo yê xebergirotişî vejyenê” abîya.Temsîlkarê Herema Enqera yê DÎSKî Taygun Gorgunî damûstayîn wend û aşkere kerd ke bi morkerdişê televîzyon û radyoyan hikûmet bêtehamulîya xo ya verra îtiqat, ziwan û kulturanê cîya damûsna. Gorgunî da zonayen ke derbeya ke dûştê çapemenî de virazîyena do zey lekeyekê bikebo tarîxê welatî.
15ê Temmuze ra dima êrişê bî vêşî
Gorgunî vist vîrî ke AKP hewldayenê derbeya 15ê Temmuzî açarna zey firsetî û aşkere kerd ke polîtîkayê herbî yê zerre û teberî qesawet (qaxû) kenê. Gorgunî qiseyanê xo bi nê vatişan qedîna: “Ma dê nêtersê, peyser gam nêerzê, heta peynî wayirê heqê xebergirotişî bivejyê û bi şarî ra pîya ma dê bi paştîdayîşêyewbînan, girdêr bikerê. Seroka Şûbeyê Sendîqaya Rojnamegerê Tirkîye Dem Gurbetelî zî da zonayen ke êriş dûştê azadîya xebergirotişê şarî yo û va, ganî pêrokîn şar poştdayenî girder bikero û êrişanê faşîzan peyser pijiqno.
NAVENDÊ XEBERAN