Yeno pawitene ke seba referandûmî weçînayişî aşma Nîsane de virazîye. HDP, HDK, KCD, DBP û TJA startê gureyînanê referandûmî bi deklerasyonekê wertex û bi slogana “Bi ‘Nê’ ma dê dîktatorî rê vajê vindere” day. Hemserokê Pêroyî yê DBP Kamûran Yuksek ke deklerasyonî wend va, “Ma dê destûr nêdê qanûno bingeyî ke ti problemanê ma çareser nêkena û vajê  ‘Nê’.  

Hemseroka KCD Leyla Guven, Hemverfekê HDK Gulîstan Kiliç Koçyîgît û Onur Hamzaogullari, Serokwekîlê koma HDP, hemşaredarê DBP, Wekîla Serokê Meclîsê Pervîn Bûldan û xeylê sîyasetmedarî tewrê kombîyayişa ke Amed de virazîya bî.  Kombîyayiş de bi deklerasyonekê wertex startê gureyînanê referandûmî ame dayen. Deklarasyono ke hetê Hemserokê Pêroyî yê DBP Kamûran Yuksek  ra ame wendiş wina yo: 

Prosesê tewr krîtîk yê tarîxê Tirkîye 

“Ma prosesê tewr krîtîk ê tarîxa Tirkîye cuyenê. Babedanê zey çarekerdişê meseleya kurd, meseleyê civakî, ekonomîk, problemê rayverîna Tirkîye û demokrasî de ma prosesê ke ameyoxê Tirkîye dîyar bikerê de yê. Prosesê referandûmî do senînîye ameyoxê şaran zelal bikero. Çimeyê çareser nêkerdişê meseleya kurd, yê problemanê elewîyan, yê pêrokîn kamîyanê bîn, îtiqatan, azadîya cinî, meseleyê emeg û ekolojî; politikayê şaş, derbe, OHAL û qanûno bingeyî ke ronayişê Komara Tirkîye ra na het yenê ferzkerdişî yê. Çike qanûno bingeyî ser yew zihnîyetî ameyo viraştiş. Xeynê qanûno bingeyî yê 1921’î, serra 1924’î ra nat pêrokîn qanûnê bingeyî ke amey viraştiş, şarê kurd û pêrokîn şaranê Tirkîye, bawerî û kamîyanê Tirkîye înkar kerd. 

Qanûnê bingeyî peymanê civakî yê. Ganî viraştişê ci de fikir û îradeyê pêrokîn şaran, bawerîyan mîyan de bibo. La yeno vînayen ke qanûnê bingeyî ke heta nika amey viraştiş erjayeyanê civakî ra dûrî yê. Tenya ser menfeatê tayî şexsîyetan ser de ameyê nuştiş. 

Wazenê goreyê xo virazê

Demê ewroyî de zî meseleya kurd yena înkarkerdiş. Wazenê têkoşîna şarê kurd û sîyaseta demokratîk bin zextan de bipelçiqnê. Hemserokê HDP, DBP, parlamenter û rayveberê kurd, hemşaredarê kurd, endamê meclîsî, bi hezaran endamanê ci, temsîlkarê saziyanê demokratîk û civakî, rayveberê sendikayan, gurekaranê çapemenî yenê tepiştiş. Şaredarîyanê şarî destser kenê. Pêrokîn televizyon, radyo, rojname û medyaya kurd ya muxalif gênê û OHAL îlan kenê û pêrokîn beşê muxalif teber de verdanê û wazenê qanûno bingeyî reyna goreyê xo virazê. 

Ma benê yewe

Verîya her çî ma wazenê vajê: Ma şarê kurd û nasnameyê pêrokîn şaranê bîn, bawerîye hemî beşê civakanê bîn, benê yewe. Civaka sivîl û quwetê siyasî dûştê na komkiştena sîyasî ma dê tekoşîna heq û azadîye şaran berz bikerê. 

Şarê ma tarîx de her tim raştê polîtikayanê înkar, asîmîlasyon, talan, wêran û komkiştenan ame. Ma dê çarçoveyê pawiyeyanê şarê xo plan û polîtîkayanê tesfîyekerdişê sîyaseta ma bi xoverdayişî pûç bikerê.  No qanûno bingeyî verîya her çî qanûnê AKP-MHP yo. Qanûnê netewperest, yekane, nîjatperest, zayendperest û navendî yo. Zerreyê no qanûnî de şarê kurd, tirk, elewî, cinî, emekdar û demokrasî çîn o. 

Ma dê bi quwet vajê ‘Nê’ 

Qanûno bingeyî ke şarê ma wazenê ena nîya. Rîwalê nayî zî ganî ma referandûmî de vengê ‘Nê’  bidê. Referandûmî de vejyayişê vengê Nê’ seba her kesî û civakî do bi feyde bo. Eke referandûmî de vengê Nê’ bivejyo, do îtîfaqa AKP-MHP bîro welişnayiş. Eksê ci de do înkar, tesfiye û konseptê şerî dewam bikero. Nayî ra şarê ma do na raveyşîyayişî rê vajo VİNDERE û referandûmî de qanûno bingeyî rê vajo ‘Nê.’  

Bi nê pêrokîn rastîyan, ma bawerî kenê ke şarê ma, zey 7ê Hezîranî dê bi rihê Newroz tewrê gureyanê referandûmî bibê, dê şirê ser sandiqan û seba haştî, çareserî, demokrasi û azadî rolê xo yê tarîxî kay bikerê. Zey weçînayişanê 7’ê Hezîran iyê dê xo koordîne bikerê, bi rihê Mehmet Tûnç, Pakîze Nayir, Sêvê Demîr gureyan biramnê. 

Ganî ma seba waştenanê xo ke seba qanûno bingeyî ya demokratîk ke mîyan de heqê şarê kurd, kamîye bîn, azadî û demeokrasî esto, bi quwet damûsnê.“   


 DÎHABER/AMED