Roja Dayîkan ke her serre hewteyo 2. yê aşma gulane de yeno pîrozkerdiş, emser Kurdistan de bi hawayo dejin yeno pêşwazîkerdiş.
Dayîkê ke her serre ê û domanê înan yenî qetilkerdiş, emser bi şahîdîya qetilbîyayîşê domananê xo vîyarnayî.Dayîkan muhîmîya na roje ser o qisey kerdî. Razîye Işiktaşe dîyar kerde ke heta ke domanê înan yê vîndîbîyaye nêrî dîyayîş, hesabê Dayîka Taybete û Hedîye Şene nêro perskerdiş ê do Roja Dayîkan pîroz nêkerî. Işiktaşe dewamê qiseykerdişê xo de arde ziwan ke dayîkê ke domanê înan ameyî qetilkerdiş û zîndanan de yî rê ti manaya na roje çina.
Ma do xover bidî
Dayîkan ra Gule Kiliçe zî va ‘seba ke domanê ma wayîrê nasnameyê xo vejîyayî, zîndanan de yî’ û wina dewam kerde: “Ganî Dayîka Taybete û Hedîye Şene nêrî vîrîkerdiş. Ma zaf dejî antî û ma do senî na roje pîroz bikerî. Ma do heta dalpeya gonîya xo ya peyêne xover bidî.” Dayîke Emîne Denîze bale ante muhîmîya dolbenda sipîye ser û va ‘dayîkê ke seba ke şer bivindero vejîyayî raşteyan, erdî ra ameyî kirantiş, kutiş û ameyî qetilkerdiş’.Dayîka Aştîye Nazmîye Yureke zî wina va: “Ma tim bi etirîyayîşê tepişîyayîşê domananê xo cuyenî. Ma bimirî zî, keyeyê ma bêro veşnayîş zî, ma do tim azadî biqîrî û azadî ra fek veranêdî.”
ŞÛJIN/AMED