Amed de, vizêr bi hezaran kes vera qetlîamanê dewlet Nimazê Îne de, Sumerpark de are bî. Hemserokê HDP Selahattîn Demîrtaş ra piya xêlê siyasetmedarî zî tewrê nimazî bî û xîtabê welatijan kerd. Demîrtaşî va, ma rojanê zehmet ra vêrenê ra. Werteyê zerya ma de kuleke esta. 6 aşmiyo merdiş û hesrê çiman estê”.
Selahattîn Demîrtaş’î da zonayen ke, rîwalê xirsê ‘her çî do yê mi bo’ însanî mirenê û wina va: “Wazenê her çî bigîrê bin milk û serdestiya xo. Bi tanq û topan erzenê sûkan ser. Peycoy zî vanê ‘ewja de qûwetê bi tifingî estê’. Eke qûwetê bi tifingî bibê zî çiyo ke yeno kerden sûc o”.
Şarê ma esto
Demîrtaş’î aşkere kerd ke, eke AKP şerm nêkero do vajo Homa zî yê ma yo û wina dewam kerd: “Bi na zihnîyet hetê kotî şinê nêzana. La ganî jû raya haştî bîro akerden. Eke herb de israr kenê se, ma dê zî milê xo nimiz nêkerê. Na zihnîyeta Enqera ma rê haştî xelat nêkena. Encex ma êşkenê haştî biyarê.
Hemserokê HDP Selahattîn Demîrtaş’î vist vîrî ke, AKP hendo ke Seray ra tersena Homa ra nîtersena û wina veng da Davûtoglû: “Ey Davûtoglû ti zey serokwezî ro ke cenazeyan rê zilm keno kewtê tarix. Şima cenazeyan erdî ra kaş kerdî, bedenê ceniyan kuçeyan de teşîr kerd. Beno ke sawciyê to bibê, ê ma zî şarê ma esto.
Zey Cizîr û Sûr ma dê zî xover bidê
Demîrtaşî va, şima vanê qey bi îşkenceyan, bi tehdîdan ma dê şima rê bîat bikerê, şima dê bi xoverdayişê ma çinî bibê.Selahattîn Demîrtaş ard ziwan ke, eke hesabê şima bibo bi ma ra bivînê, wa domanî, gencî bedel nêdê û vatişê xo wina domnay: “Senî ke şarê ma Cizîr de, Nisêbîn de, Sûr de ser payan de xover da, ma dê zî xover bidê.
Bi hezaran welatijan rexmê varon Nimazê Îne kerd û serva kesê ke xover danê dûa kerdî. Parlamenterê HDP yê Amed Nîmetûllah Erdogmuş’î Nîmazî rê rayverîn kerd. Dayikê ke gedeyê ci Sûr de amey qetilkerden zî nimazî de vera Reîscûmûrê Tirkiye hêrs û nêrazîbiyen damusnay. Dayikan bi vatişanê ‘Erdogan ti kiştoxê gedeyan ê’ îsyan û hêrsê xo qîr kerdî.
DÎHA/AMED