Parlamenterê HDPyî Dîlek Ocalane, Sîbel Yigîtalpe û Leyla Bîrlîk derheqê deklarasyonê wertex û kampanyaya ‘nê’yî de Ajansê Firatî rê qisey kerdî.
Dîlek Ocalane va ‘sebebê krîz û kaosî hukmatê AKPyî bi xo yo’ û qiseykerdişê xo wina domnaye: “Qanûno bingeyîyo ke yeno viraştiş reyde wazenî erjê komelî çin bikerî û wazenî qanûno bingeyîyo ke merkezê ci de yew merdim esto, awan bikerî. Şert û mercê OHALî de viraştişê referandûmî raşt nîyo û na rewşe do Tirkîya ver bi kaosêko kûr bikiranco. AKP bi qedênayîşê prosesê çareserî Tirkîya 20 serran tepîya berdo. Eke netîceyê referandûmî de ‘nê’ bivejîyo, do şer biqedîyo. La eke ya bivejîyo, Tirkîya do biba cayê felaketî. AKP wextê xo pirr kerdo û do netîceyê referandûmî de têk şêro. Ma şarêko birêxistinkerde yî, ma do serbikewî. Peynî do muhteşem bibo.”
Cepheyêk awan kerdî
Parlamentere Yîgîtalpe zî dîyar kerde ke ‘hukmatê AKPyî ser îqtîdarê qesre ser ro kampanyayêk dano meşnayîş’ û qiseykerdişê xo de wina va: “Her çiqas ke zext û Qerarnameyê Hukmê Qanûnî (KHK) estî zî ma do xebatê xo yê referandûmî bidomnî. Xebatê referandûmî bi şert û mercê seyyewbînanî de nînî kerdiş. Parlamenter û bi hezaran endamê ma hepisxaneyan de yî û no zî parçeyêk polîtîkayanê AKPyî yo. Weçînayîşê 7ê hezîrane de zî wina kerdbî. Çarçeweya Mutabakato Milî de AKP û MHPyî cepheyêk awan kerdî. Qerarê ci zî 8ê hezîrane de amebî dayîş. Pey newe ra viraştişê weçînayîşan de zî no hesabê hukmatê AKPyî û Erdoganî esto.”
Wa her kes veng bido
Yîgîtalpe dewamê qiseykerdişê xo de va ‘yê ke vanî nê yew bi yew yenî tewqîfkerdiş û bi no hawa xebatê înan yeno astengkerdiş’ û wina dewam kerde: “7 serreyî ra heta 70 serreyî do her kes vera dîktatorî de vajo ‘nê’. Ma do dormeyê ‘nê’yî de bîbî yewe û ma do qezenç bikerî. Çîyo tewr xêrin vera nînan de vatişê ‘nê’ yo. Heta ke qanûno bingeyîyêko demokratîk bêro, ma do vajî nê. Ma tena seba kurdan nêvanî ‘nê’; ma seba elewî, sûnî, kurd, tirk û heme şaranê bînan vanî nê. Ganî her kes veng bido nê vengdayîşê ma.”
Do peynîya ci bîyaro
Leyla Bîrlîke zî wina va: “Qederê yew welatî rewşê îstîsnayî de nînî dîyarkerdiş. Tena dîktator û derbekarî rewşê winasî de qanûno bingeyî bedilnenî. Çîyê ke nika benî wextê derbeya 80î ra xirabêr î. Hukmatî bi hawayo aşkere neheqî û înfazan kerd. Serrê 80î de bi hawayo nimite ameyêne kerdiş. Labelê ewro heme dinya wehşetê cêrzemînê Cizîrî temaşe kerd. No proses do peynîya Tirkîya bîyaro.”
Bîrlîke peynîya qiseykerdişê xo de va ‘no qanûno bingeyî nêbeno yê şaran’ û wina qedênaye: “No referandûm de reyê kurdan muhîm î. Ti muhîmîya vatişê ‘eke şima reyanê xo nêdî ma, do kaos bivejîyo’ nêmendo. Ma do keye bi keye, taxe bi taxe bigêrî û zûranê AKP û Erdoganî şarî rê vajî. Ma nika ra dest pêkerd. Ma bawer î ke do şar vajo nê. Erdogan seba ke nêro mehkemekerdiş, nika ra beşdarê xebatanê referandûmî bîyo. Ma zî do heme cayan de xebatanê xo bimeşnî û ‘nê’yî rêxistine bikerî.”
HULYA EMEÇ / ANF / ŞIRNEX