AKP girotişê 10 qenalane televîzyon û 12 radyoyan ra dima şewa verî zî bi qerarê Qerarnameyê Hukmê Qanûnî Ajansa Xeberan yê Dîcle, JINHA, Azadiya Welat ve Ozgur Gundem ra pîya 15 ajans û rojnameyî girotî. Dûştê na derbe rojnamegeran aşkere kerdî kê iyê dê peyser gam nêerzê û nuştişî rê dewam bikerê. Cemîyetê Rojnamevanên Azad derheqê girotişî de Şaxê ÎHD yê Amed de kombîyayiş viraşt.
Kombîyayişê çapemenî de temsîlkarê weşan, gurekarê DÎHA, JINHA û Azadiya Welat ra pîya rayveberê ÎHD û xêlê kesî tewr bî. Wayîrê Îmtiyaz yê Azadiya Welat Remezan Olçenî kombîyayiş de qisey kerd û dîyar kerd ke rixmê zextanê serranê 90î rojnamevanan karê xo ramit. Olçenî va, senî ke ma vizêr nusna, ma dê ewro zî binuse û aşkere kerd ke ti quwet nêşkena înan raya ke bawer kenê ra bigîro.
Peyser gam nêerzenime
Nûçegihana JINHA Bêrîtan Canozer zî derheqê girotişê keyepela înan de damûstayîn wend û wina va: “JINHA ya ke heta roja ewro bîya vengê cenîyan, domanan, hetê hikûmeta AKP ke quwetê cenîyan ra terseno amê giroten. Canozer aşkere kerd ke iyê dê heta peynî raya Gurbetelî Ersozlan, Deniz Firatan û Şîlan Arslanan de ray şirê û rêçdarê tekoşînan înan bê.
Midûra Karê Nuşteyî yê Verpersê DÎHA Dicle Mufîtoglû zî eleqe ant hêriş û zextanê AKP ser û aşkere kerd ke rojanê destpêkê yê şerî ra na het çapemenîya azad hedef amê girotiş û waştî bêveng bikerê. Mûfîtoglû da zonayen ke DÎHA ti wext raştîyan ra tawîz nêda û neyra tepya zî do peyser gam nêerzo.
Wazena bi nê hêrîşan raştîyan manî bikerê
Hemserokê Cemîyetê Rojnamevanên Azad Hakki Boltanî zî vist vîrî ke roja ronayişê Komara Tirkîye ra na het verra Kurdan hêrişhi kêm nêbîye û wina dewam kerd: “Xoverdayişê Apê Musa û Gurbetelî Ersoz seba ma mîras mendo. Ma dê wayîrê na mîrasî bivejyê. Rohat Aktaş zî nimûneyê nayî yo. Çapemenîya Azad zey her roj, ewro zî peyser gam nêerzena.” Serokê Şaxa ÎHD yê Amedê Racî Bîlîcî zî diyar kerd ke dewlet wazena bi nê hêrîşan raştîyan manî bikerê û vernîya xoverdayişê şarî bigîro. Bîlîcî va, ma dê çapemenîya azad het de ca bigîrê. Damûstayîn bi slogana “Çapemenîya azad nîna bêveng kerdiş” qedîya.
ANF / AMED