Fermandaranê QSD ra Rojda Felat, ke derheqê "Cenga Gird” de qisey kerd, da zanayîş ke ê dê wextekê nezdî de Reqa çeteyanê DAIŞ ra bixelesnê û teslîmê şarî bikerê. Felat hêrîşê rejîma Sûrîye yê hewayî rê nêrazîbîyayîş damûsna.
Hemleya ‘Cengo Gird’î ke hetê Quwetanê Sûrîyeya Demokratîk (QSD) ra 6ê Hezîran de destpa kerd, ramena.Şer vêşêr taxanê El Berîd û Qedisîye de rameno. Heta nika bi seyan welatijê sivîl amey xelesnayîş.
Fermandaranê QSD ra Rojda Felat, derheqê hemleya ”Cenga Gird” de qisey kerd û vist vîrî ke Reqa de averşîyayîşê înan rameno. Felat herzewbîn hayr ant hêrîşanê rejîmî ser zî û aşkere kerd ke, bi sebebo ke înan plananê rejîma Sûrîye xirab kerdî, hêrîşê rejîmî bî vêşî.
Taxan de şerekê giran esto’
Felat ard ziwan ke operasyonê înan o vera DAÎŞ’î bi serkewtî aver şino û pare kerd ke, rîwalo ke ê pêroyîya Reqa destê DAİŞ ra bixelesnê, ê metodanê newî esas gênê. Felat da zonayen ke, înan nê metodanê newî de serkewtişê girdî visto dest.
Fermandar Rojda Felat, hayr ant vatenanê “DAIŞî rê korîdor akerdî” ser û wina va: “Nê vatenî seba propagandaya sîya vila benê. Ma pêrokîn taxê ke destê DAİŞ’î de yê de şerekê giran danê ramiten. Her roj bi maşîneyanê bi bombebarkerdî hêrîş kenê. Taxan de şarekê giran esto.”
Planê rejîmî xirab benê
Felat hayr ant hêrîşanê hewayî yê rejîma Sûrîye ser û wina va: “Cayê ke ma mîyan de yê teyareyî bombarduman kenê. Averşîyayîşê ma yo ver bi Reqa rejîma Sûrîye bêzar kerd. Nayî ra teyareyê herbî hêrîşê ma kenê. Averşîyayîşê ma plananê rejîmî û Rûsya xirab kerd. Wa her kes rind bizano ke, ma dê cewab bidê nê hêrîşan. Hêrîşê bi no rengî dê nêşê vernîya xelesnayîşê Reqa bigîrê.”
Felat tewr peynî de vist vîrî ke ê dê bi pêrokîn quwetê xo vera DAIŞî şer bikerê û wextekê nezdî de Reqa destê DAIŞ ra pak bikerê û teslîmê destanê şarê Reqa bikerê.”
NAZIM DAŞTAN DÎHABER/REQA