EVÎN CÎLO / MAHÎR YUCEKAYA / ANF/BEHDÎNAN  


9ê Teşrîna verêne hem roja destpêkerdişê Komploya Mîyanneteweyî yo û hem zî roja hetê hêzanê serdestan ra qetilbîyayîşê şorişgero namdar Che Gueverayî yo. Emser serrgêra 19. ya Destpêkê Komploya Mîyanneteweyî û serrgêra 50. ya mergê Che Gueverayî yo.

Babete ser o Endamê Komîteya PKKyî Duran Kalkan, Endamê Komîteya Caardişî Bozan Tekîn û Endamê Komîteya Merkezî Kasim Engînî qisey kerdî.

Endamê Komîteya PKKyî Kalkanî ‘serra 50. ya mergê Che Gueverayî de ey yad kerd’ û wina va: “Ewro neslê 68î şexsê Gueverayî de têkoşînê ma de cuyeno. Şorişgerîya PKKyî bingeyê xo şorişgerîya Che Gueverayî ra gêna. Hem şorişê Kuba û hem zî yê Vîetnamî PKK û Rayber Apo ser de tesîrêko gird viraştî. Labelê mîyanê nînan de yê ke hetê teorî û pratîkî de tewr zaf tesîr kerdo, şorişgerîya Che Gueverayî yo. Ma parçeyekî yê şorişê Tevgerê 68î yê Kurdistanî yî. “ 




Ma ê têkoşînî koyan de domnenî

Kalkanî va ‘heto bîn ra Che Gueverayî dewlete, îqtîdar, wezîrî û mal û milkî red kerd û seba merdimîye sîleh girewt, şer kerd’ û wina domna: “Ti kes nêşeno vajo ‘xeta Rayber Apoyî ey ra cîyayêr a’. Qet şik çin o ke heme çîyê ci eynî nîyo, labelê xeta Apocîyan tewr zaf nizdîyê Che Gueverayî ya. Ma tevgerê gerîla ke Che Gueverayî dabî destpêkerdiş, koyanê Kurdistanî de domnenî. Ma koyî derbaz kerdî ewro çol û bajaran de domnenî. Rayber Apoyî tevgerê gerîla yê Rojhelato Mîyanênî sey hedefî rona vernîya ma. Cok ra 9ê teşrîna verêne seba ma muhîm o. Fermandarîya Che Gueverayî bena fermandarîya gerîla. Vera komplo de ya muhîm derbazkerdişê embazîya ke qîm nêkena ya. Ganî ma ruh, hîs û sîstemê fikrî ke beno sebebê embazîya kêmî orte ra wedarnî.” 


PKK de ruhê ci esto

Tekînî dewamê qiseykerdişê xo de va ‘mi reya sifteyîne mîtîng û meşîyayîşan de Che şinasna’û wina domna: “Dima ra embazê sey Kemal Pîr û Hakî Karerî yê tirkî ameyî Kurdistan de têkoşîn dayî û şehîd kewtî. Destpêkê têkoşînê PKKyî de ruhê enternasyonalî yê Cheyî estbî. Reyna çend rojî verê embaza Gulnaze şehîd kewte. Cinîyêka tirk bîye. Xoverdayîşê aye de zî ruhê Cheyî nimite yo. Che şexsîyetêko pîroz o. Heme cuya xo seba awankerdişê ekonomî û cuya sosyalîste rê feda kerd. Che ma ra zaf dûrî nîyo. Ruhê Cheyî Kurdistan û Rojawan de yo. Ewro bi seyan ciwanê tirk, ereb û farisî mîyanê PKKyî de bi ruhê Kemal, Hakî, Gulnaze û Ezîzî şer kenî. Ma bawer kenî ke do na felsefe qezenç bikera.”9ê Teşrîna verêne tesaduf nîyo

Engînî zî va ‘roja ke hêvîya şarê dinya Che ame qetilkerdiş de hêzê serdestî vera xo dayî Ocalanî’ û wina dewam kerd: “Komploya 9ê Teşrîna verêne şexsê Rayberê Merdimîye Abdullah Ocalanî de heme şaran hedef girewte. Cok ra no çîyêko tesaduf nîyo. Yê ke 9ê Teşrîna verêne de Che Guevera qetil kerdî, eynî roje seba Denîz Gezmîşan qerarê îdamî girewtî û reyna eynê hêzan vera Rayberê Merdimîye Ocalanî de zî eynî roje komplo dayî destpêkerdiş. Cok ra vera nê hêzan de cepheyêko ortax de rêxistine bîyayîş zaf muhîm o. 


Ganî merdim wina biewnîyo

Engînî vatişê Cheyî yê ‘ez zana ke ti seba ke mi bikişî ameyî tîya. Bide mi ro tersonek, ti do tena merdimêkî bikişî’ ke celladê xo ra vatbî, ard vîr û wina va: “O wext Cheyî seba Castroyî vatbî ‘Castro ra vajênê, mi reyde şoriş nêqedîya, do dewam bikero’. Ganî ma zî nê ruh û vindetişî rê wayîr bivejyî. Eke ewro Che Guevera nêmerdo û heme deyîr û marşan de nameyê ci derbaz beno, saya têkoşîno ke dayo ra yo. Çimkî o seba azadî, edalet û seyyewbînanî bedenê xo feda kerdo û bîyo hêvîya heme şaranê dinya. Cok ra deyîran de vatişê ‘Fermandar Ernesto nêmerdo hîna, wa şaranê dinya rê silam bo, wa bindestan rê silam bo. Wa Vîetnam, Kuba û Kurdistan ra heme dinya rê silam bo’ derbaz beno. 9ê Teşrîna verêna 1998î de Rayberê PKK Abdullah Ocalan hîna hewa de bî hêzê serdestî waştî bi fuzeyan ey qetil bikerî, eke merdim biwazo 9ê Teşrîna verêne fam bikero, ganî merdim wina biewnîyo.”