RÎM EBDULLAH / FERÎDE ÎBRAHÎM / ANHA / EFRÎN
Artêşa tirk û çeteyê ke girêdayeyê artêşa tirkî yî, tehdîdanê xo yê Efrînî ser o domnenî û hewl danî Efrînî dagîr bikerî. Babete ser o efrînijî qisey kerdî û vera nê tehdîd û dagîrkerîye de reaksîyon nîşan dayî.
Welatîyan ra Îbrahîm Sewaxî dîyar kerd ke ê do bi heme hetanê xo vera dagîrkerîya Tirkîya de bivinderî û wina va: “Ma do destûr nêdî ke Tirkîya hewnê osmanîye pê bîyaro. Ger Tirkîya û çeteyê ke girêdayeyê ci yî cesaret bikerî û hêrişê Efrînî bikerî, ma do şenik ra heta pîlan seba pawitişê erdê xo xover bidî.”
Fexrî Şahînî zî wina va: “Vakurê Sûrîye de bi zorê DAIŞî berdiş ra dima nika îmkanî ameyî qezençkerdiş. No goreyê waştişê hukmatê tirkî nîyo û cok ra wazeno Efrîn dagîr bikero. Labelê ma do piştî bidî yewbînan û nêverdî ke Tirkîya bireso amancê xo.”
Ez do YPJyî mîyan de ca bigîra
Horîya Henana ke emrê aye pîl o zî qisey kerd. Henane va ‘herçiqas ke emrê mi pîl o zî ez do beşdarê xoverdayîşê vera dagîrkerîye biba’ û wina dewam kerde: “Emrê mi seba mi nêbeno asteng û ez do hetê şerwananê YPJyî de ca bigîra. Erdogan ancax şêno xeyal bivîno û no xeyal pê nîno.”
Zeyneb Elîye zî dîyar kerde ke ê amade yî ke bi heme îmkananê xo pawitişê xo bikerî û wina va: “Ma do vera Tirkîya û çeteyê ke girêdayeyê ci yî de xover bidî.”
Hesen Hesenî zî tehdîdanê dibare yê Tirkîya ser o va ‘Tirkîya tena wazena ters bideka mîyanê şarê herême’ û wina dewam kerd: “Labelê tehdîdê înan şarê herême ser o tesîr nêkenî. Ma do hertim hetê şerwananê YPG û YPJyî de bibî.”
HeyserHemdîke zî peynîye de wina va: “Ma nê tehdîdan ver hukmatê tirkî bi hawayo wişk şermizar kenî. Eke Tirkîya cîddî bo, wa xo biceribno, ma heqdar î û ma do qezenç bikerî.”