Endamê Komîteya Şehîdan a PKKyî Orhan Lotûsî serrgêra 37. ya Xoverdayîşê 14ê Temmuze de şehîdê 14ê Temmuze vîr ard û wina va: "Şehîdanê 14ê Temmuze ramot ke bi xoverdayîşî merdimî eşkenê bi ser bikewê. Şehîdê 14ê Temmuze bîyî tîmsalê na yewe û ramot ke çew nêeşkeno nê tevgerî biqedêno."

TOPRAK EREN/ROVAN REŞÎT / ANF / BEHDÎNAN

Endamê Komîteya Şehîdan a PKKyî Orhan Lotûsî serrgêra 37ine ya Xoverdayîşê Rojeyê Mergî yê Pîlî yê 14ê Temmuze ser o qisey kerd û mesajê muhîmî dayî.

Lotûsî va ‘sere de şexsê embazî Helmet, Devran û Şahînî de ma heme şehîdanê şorişî bi vîr anê’ û wina domna: “Embaz Helmetî bi cuye, têkoşîn û xoverdayîşê xo reyna ramot ke xoverdayîş bi ser keweno. Bi cuya xo bi nimûne. Şexsê înan de şehîdanê 14ê Temmuze Kemal Pîr, Hayrî Dûrmûş, Akîf Yilmaz û Alî Çîçekî bi vîr ana.”

Lotûsî dewamê qiseykerdişê xo de wina va: “Şehîdê 14ê Temmuze ramot ke bi xoverdayîşî merdimî eşkenê bi ser bikewê. Merdimî eşkenê zorê faşîzmî bîşêrî. Ê bîyî beyraqa destpêkî. Beyraqa ke înan kerde berz bi xoverdayîşî resa dereceyêka core. Embaz Helmet, şehîdê ma yo tewr peyên o ke dereceya serkêşîye de no têkoşîn rayra berdêne, serkêşê nê xoverdayîşî bi. Faşîzm, dagîrkerîya Tirkî waşt reyna şexsê embaz Helmetî de têkoşînî biqedêno. No şehîdê ma yo tewr peyên, şehîdêko bierc, biked bi û têkoşînê xo resna dereceyêk.”

‘Xîyanet û teslîmîyet ame veşnayene’

Lotûsî bale ant çalakîya Kemal Pîran ser û mîrasê aye çalakîye ser o vindet: “Embazê Kemal Pîrî binge rona. Binê şertanê tewr zehmetan de tasfîyeya PKKyî ameyêne pawitene, dagîrkerîya Tirkî waştêne ruhê têkoşînî yê xoverdayîşî, ruhê PKK’yî şexsê serkêşanê PKK’yî de biqedêno û şorişê Kurdistanî û yê Rojhelatê Mîyanênî ke tevgerê Apoyî serkêşîya ci keno, destpêk de biqedênî. Naye ra zîndan de bi metodanê tewr barbaran, bi metodanê teberê merdimîye ke tarîxê merdimîye de nimûneyê ci çin ê, îşkenceyê zaf giranî embazanê serkêşan rê ameyî kerdene. Labelê kila ke embaz Mazlûm Doganî Newroze de tafîna, ke ma ewro zanê bi mîlyonan Newroze pîroz kenê, adiro ke embaz Mazlûmî tafîna xîyanet û tasfîye veşnayî.”

AKP domanê 12ê Êlule yo

Lotûsî qiseykerdişê xo de ca da vatişê Raybere Şarê Kurdî Abdullah Ocalanî û wina va: “Ruhê PKKyî ruhê xoverdayîşê zîndanan o, ruhê serkêşan ê zîndanan o, embazî Kemal Pîr, Ferhat, Necmî heme bîyî binge. Ma eşkenê ‘Çaran’ zî bi vîr bîyarê. Ê embazan zî vera teslîmîyetî de adir verda bedenê xo. Teslîmîyeto ke bi zorî, bi îşkenceyî û bi zextê teberê merdimîye înan ser o amebi ferzkerdene înan bi adirê bedenê xo o teslîmîyet qebul nêkerd. Xo teslîmîyetî ra kerd pak. Ewro reyna hukmatê AKP-MHPyî yo faşîst bi heman nizdbîyayîşî seba ke PKKyî biqedêno, hêrişê tevgerî keno. Bi nameyê planê ‘Çokronayîşî’ û ‘Çinkerdişî’ prosesêk da destpêkerdene. Vat, ‘pîyê şima nêeşka ma biqedênî, şima do zî nêeşkê ma biqedênê.’ Ganî rind bêro zanayene ke AKP domanê 12ê Êlule yo. Kenan Evren, pîyê înan nêeşka nê tevgerî biqedêno, şima do zî nêeşkê. Şehîdê 14ê Temmuze bîyî tîmsalê na yewe û ramot ke çew nêeşkeno nê tevgerî biqedêno.”

‘AKP û MHP vîsta peyêne de yî’

Lotûsî qiseykerdişê xo de va ‘senî ke çew nêşi serê cenazeya Kenan Evrenî, gama ke hukmatê AKPyî zî bin kewt wa o zî bi heman hawayî şiro serê sergoyê tarîxî’ û wina qedêna: “Ma dewrêkê winayênî de yê. Na yewe ra dişmen bi hawayêkê barbarî hêriş keno, dişmen tenge de mendo, tewa mergî girewta. Cesaret û fedakarîya embazan ê zîndanan bi xoverdayîşê tewr peyênî ramot ke bi nê ruh û fedakarîye ma eşkenê zorê faşîzmî bîşêrî. Faşîzm do bi ruhê 14ê Temmuze bin bikewo. Faşîzm do bi çalakgerîya embaz Kemal Pîrî bêro qedênayene. Faşîzm do bi PKK’yî, bi ruhê PKK’yî, bi felsefeya Rayberîye bêro qedênayene. Xonimitişê hemverê faşîzmî do bibo sebebê mergî. Ganî şarê ma na babete de hîşyar bo. Nêkewo halêkê winayênî. 12ê Êlule de zîndanan de çi îşkence xoverdayoxan rê ameyêne kerdene, ewro heman îşkence hemverê şarî de yeno kerdene. Nêverdanê merasîmê embazanê ma yê şehîdan zî bêro viraştene. Çunke şarî ra terseno, xoverdayîşê şarî ra terseno. Azadîye ra terseno, zano ke do mergê înan bo. Ma do hemleya ‘Faşîzmî birijnê, Kurdistanî azad bikerê’ aver berê, faşîzmî biqedênî û Kurdistanî azad bikerê.“