Nisêbîn de xoverdayîşê xoserîye ra dima taxê ke tede pêrodayîşî bîyî de bi aşman o înşaatê TOKÎ dewam kenî. Heta nika pêro pîya 8 cenazeyî binê nê înşaatan ra ameyî vetiş.
Tewr peynî hewteyêkî verê cenazeyêkî ameybî vetiş û dima ra amebî musayîş ke cenaze aydê Abdullah Akî ya. Cenazeya Abdullah Akî ke erşawîyaye Qoser, nîno zanayîş ke netîceyê testê ci yê DNAye key vejîyeno.
Goreyê melumatê ke çimeyanê herême û keyeyî ra ameyî girewtiş; cenazeyi ewil erşawîyenî Nêweşxaneyê Dewlete yê Nisêbînî. Çend saetî ra dima dozger rapor nusîyeno û cenaze erşwîyena Nêweşxaneyê Dewlete yê Mêrdînî. Wexto ke ca bibo, cenazeyî morgê nê nêweşxaneyî de manenî, labelê eke ca nêbo, cenazeyî erşawîyenî Nêweşxaneyê Dewlete yê Qoserî. Cenazeyî herinda ke bi hawayo lez bêrî definkerdiş, nizdîyê 15 rojan zî ewja de yenî vindarnayîş.
48 cenazeyî ke hema nêameyî teşhîskerdiş estî
Badê 15 rojan cenazeyî bi vatişê ‘testê ci yê DNAye ame kerdiş’ erşawîyenî Riha û bê xebera keyeyan goristanê bêkesan de yenî definkerdiş. Wextê morgî yan zî wextê testê DNAye de nîno zanayîş ke raybazêko senîn yeno meşnayîş. Çimkî çi îdareyê nêweşxaneyî û çi zî xebatkarî ti melumat nêdanî keyeyî. Nika 48 cenazeyî ke hema nêameyî teşhîskerdiş estî. Zafaneyê nînan Riha, Stenbol, Mêrdîn û Amed de goristananê bêkesan de ameyî definkerdiş. Keyeyî hetê dozgerî ra bi vatişê ‘eke netîceyê DNAye dîyar bibo, ma do cenazeyan bidî şima’ yenî mijûlkerdiş û heta nika 28 cenazeyî nêameyî dayîş.
Wa fek mijulkerdişî ra verabidî
Babete ser o keyeyî vatî ‘dewlete verê kişena, dima ra seba kateyan ma mijul kena’ û wina dewam kerdî: “Kurdan rê heme çî meşrû yo. Ma do fek waştişê xo ra veranêdî û heta ke mezelêkî domanê mi bibo, nêvinderî. Wa fek mijulkerdişî ra verabidî. Heta ke ma cenazeyanê xo nêgirî, ma qirika înan veranêdanî.”
JINNEWS/MÊRDÎN