Fermandarê MPŞyî Mûrat Karayilanî dagîrkerîya dewleta tirkî ser o va ‘ma do girêkê Kurdistanî zî dewleta Tirkî rê nêverdê’ û wina domna: “Beno ke bica bibê, labelê do bedelê ci bidê. Dişmen kura de bibo, ma ûca de yê. Ma do fek ti cayêk ra veranêdî.”

 

KENDAL DENÎZ / ANF / BEHDÎNAN

Fermandarê Qerargehê Merkezê Pawitişê Şarî (MPŞ) Mûrat Karayilanî derheqê hêrişanê dagîrkerî yê dewleta Tirkî yê Başûrê Kurdistanî de û xoverdayîşê gerîlayan ê vera dagîrkerîye qisey kerd û mesajê muhîmî dayî.

Karayilanî destpêk de bale ant xoverdayîşê grevanê vêşanîye û rojeyê mergî yê ke hemverê tecrîdkerdişê Rayberê Şarê Kurdî Abdullah Ocalanî ameyî kerdene ser û va ‘netîceyê nê xoverdayîşî, çalakîyanê fedaîyan û têkoşînê dayîkanê mexmelsipîyan de dêsê tecrîdî yê Îmrali ameyê rijnayene’ û wina domna: “Beno ke bi temamî peynîya tecrîdî nêameya, goreyê prosesanê polîtîkan beno ke bêro vurnayene, labelê dêsê tecrîdî ame rijnayene. Rayber Apo seba ke dewleta Tirkî bianco serê zemînê demokratîkî xeylî cehd keno. Na babete de bi waştiş û sebir têkoşîn dano.”

Fermandarê MPŞyî Karayilanî vat ‘Dewleta Tirkî seba ke şer de û hêrişanê xo yê verê cu de bi ser nêkewte, dest bi konseptêkê şerî yê neweyî kerd’ û wina dewam kerd: “Cewherê konseptê neweyî wina yo; Vakurê Kurdistanî de bicaardişê ‘planê binfînayîşî’, Başûr û Rojawanê Kurdistanî de zî temamkerdişê teşebusê dagîrkerîye. Vana qey a do problemê Kurd û Kurdistanî yê seserrî bi nê hawayî hal bikero. Yanî wazena bi sîyasetê qirkerdişî problemî raste ra wedarno.”

 

Wa heme vera dagîrkerî de bivinderê

Karayilanî dîyar kerd ke çîyo ke sîyasetmedarê Başûrê Kurdistanî fam nêkenê yan zî nêwazenê fam bikerê, no konseptê dewleta Tirkî yo newe yo û wina va: “Dewleta Tirkî çarçewaya nê konseptî de destpêkê serra 2018î ra kena ke nê planê xo yê dagîrkerî bero sere. La dewleta Tirkî xetemîyaya, Efrîn de, Lêlîkan de xetemîyaya û seba ke bieşko estbîyayîşê xo yê Lêlîkanî bipawo, dest bi dagîrkerîya wareyanê Xakurkê kerd. Ganî tena PKK nê, heme hêzê Kurdistanî vera na dagîrkerîye de vejîyê. Gama ke ma nê vanê, ma nêvanê ke wa bêrê hetkarî bidê ma. Nê! Nika Başûrê Kurdistanî de teşebusêkê dagîrkerî esto, coka ma vanê.”

 

MÎT tena vera PKKyî de nêxebetîyeno

Karayilanî va ‘MÎT nika selahîyetdaranê Başûrê Kurdistanî goşdarî keno’ û wina dewam kerd: “Telefonanê înan goşdarî kenê û înan şopnenê. Ma na rast nêvînenê. Dewleta Tirkî hêzêko dagîrker o, qatil o. Ma heme dî ke Efrîn de, Cizîr de se kerd. Çîyo tewr xirab zî dewleta Tirkî reyde hemkarî kenê, ge-ge îstîxbarat pare kenê. No seba menfîetanê ma yê neteweyîyan şaş o. Seba ke ma bieşkê amancanê dewleta Tirkî yê Başûrê Kurdistanî bivindarnê, ganî ma qetîyen polîtîkayêka neteweyîye biafernê. Amancê dewleta Tirkî o yo ke mîyanê Kurdan de şer virazîyo. Bi na polîtîka wazena Kurdan parçe bikero. Ganî ma nêkewê dame.”

 

Do dewleta Tirkî bedelê dagîrkerîye bido

Karayilanî derheqê xoverdayîşê gerîlayan ê Başûrê Kurdistanî de va ‘ma gerîla yê’ û wina qedêna: “Beno ke dewleta Tirkî girêk de bica bibo. No seba ma zeyîfî nêya. Hetê ma de zî bi metod û hawayêk estê. Yanî ma ci ra nêvejênê. Dişmen ûca de bo ma zî ûca de yê. Ma dî ke mîyanê serrêk de înan Lêlîkan de senî bedel da. Serrêk mîyan de xeylî merdeyê înan bîyî, la şarê Tirkî ra nimitî. Nika girî kerdê vêşî. La panc-şeş girê bîn ê. Vînîbîyayê înan zî do hîna bibê zêde. Xoverdayîş do hîna bibo gird, bi hawayêkê tarîxîyî do dewam bikero. Ma do girêkê Kurdistanî zî dewleta Tirkî rê nêverdê. Bêguman ma do xover bidê. Xoverdayîşê seba azadîye û demokrasî wezîfeyê ma yo. Domanê nê şarî, keyna û lajê nê şarî do bi nê fehmî xover bidê.”