3ê Tebaxa 2014î de çeteyanê DAIŞî hêrişê Şengalî kerdbî û netîceyê hêrişî de bi hezaran kesî ameybî qetil kerdene, birîndar bîybî û bazaran de ameybî rotene. Emser serrgêra 4. ya qetlîyamî yo û ciwanê êzidî bi wesîleya serrgêra qetlîyamî îzehetêk dayî çapemenîye. Ciwanê endamê Yewîya Ciwananê Êzidî (YCÊ) û Cinîyê Ciwanî yê Êzidî îzehet de veng dayî herkesî ke wa beşdarê merasîmê vîrardişî bibî. Îzehet hetê endamê YCÊ Berzan Şengalîyî ra ame wendene. Şengalîyî dîyar kerd ke ê Qetlîyamê 3ê Tebaxe şermizar kenî û kesê ke merdimanê xo vînî kerdî rê serweşî wazenî. Şengalîyî dewamê qiseykerdişê xo de wina va: “Hêzê PDKyî vernîya çeteyanê DAIŞî nêgirewtî û warê ke tede qetlîyamî ameyî viraştene, warê ke kontrolê PDKyî de bî. Bi hezaran êzidîyî ameyî qetil kerdene, birîndar bîyî yan zî bazaran de ameyî rotene.” Şengalîyî îzehetê xo wina qedêna: “Ma do derheqê qetlîyamî de çalakîye û aktîvîteyan bivirazî. 3ê Tebaxe de Şengal de, 14ê Tebaxe de Girê Ezêr, Şêx Xidir û sewbîna cayan de teqayîşî virazîyayî. Reyna 15ê Tebax de dewa Koçî de qetlîyamî ameyî viraştene. Ma do çalakî û vîrardişan bivirazî. Ma do qetlîyaman xo vîra nêkerî û hesabê ci bipersî. Ma herkesî dawetê merasîmê vîrardişî kenî.” ROJNEWS/ŞENGAL