Tevgerê Şorişê Yewbîyayeyî yê Şaran îzehetêko nuştekî da û Fermandarê Sehaya Dêrsimî Atakan Mahîrî vîr ard. Îzehet de ame vatene ke ‘Yê ke hedefê înan gird o, hewldayîşê înan zî gird o û bedelê ke bidî zî gird beno’ û wina dewam kerdo: “Hemra Atakan zî fermandarêko winasî bi. Ma soz danî, wa tarîx zî bibo şahidê ma. Ma do zorê faşîzmî bîşêrî û hesabê vînîbîyayeyanê xo bipersî.”

Çend rojî verê Endamê Komîteya Merkezî yê PKKyî, Endamê Konseyê Fermandarîye yê HPGyî û Fermandarê Sehaya Dêrsimî Atakan Mahîr (Îbrahîm Çoban) û çend embazê ci şehîd kewtbî. Tevgerê Şorişê Yewbîyayeyî yê Şaran (HBDH) îzehetêko nuştekî da û hemrayanê xo vîr ard.

HBDHyî îzehetê xo de vato ‘ma do hertim beyraqa têkoşînî yê şehîdan cayanê berzan de bitepişî û aver bîşêrî’ û wina domnayo: “Hemra Atakan nizdîyê 25 serrî bi têkoşîn û vindetişê xo heskerdişê embazanê xo qezenç kerd û awanbîyayîşê Fermandarîya Ortaxe ya Dêrsimî de bi hawayo aktîf ca girewt. Hemrayê ma Atakan eynî wextî de Fermandarîya Ortaxe û Komîteya Caardişî ya HBDHyî de zî wezîfe kerdo. Hemra Atakan hertim şertanê tewr zehmetinan de vindetişê xo yê mutewazî nîşan dayo û fermandarêko serkewte bîyo.”

HBDHyî dewamê îzehetê xo de wina vato: “Yê ke hedefê înan gird o, hewldayîşê înan zî gird o û bedelê ke bidî zî gird beno. Hemra Atakan zî embaz, mîlîtan û fermandarêko winasî bi. Donemo ke ma te de yî de hêrişî her ke şono zêde benî û herkes dişmen yeno îlan kerdene. Kurd, elewî, karker, karmend, dewij, ciwan, cinî, roşnvîr, hunermend, akademîsyen û sewbîna heme xayîn yan zî terorîst yenî îlan kerdene û hedef girîyenî. Abluqa her ke şono teng bena.”

Wezîfe û berpirsîyarîya ma giran î

HBDHyî îzehetê xo de qala têkoşînê yewbîyayeyî yê şaran kerdo û wina vato: “Yê ke na abluqa parçe bikero û zorê faşîzmî bîşêro, têkoşînê yewbîyayeyî yê şaran o. Ganî ma vera faşîzmî de yewîya şaran awan bikerî û no wezîfe û berpirsîyarîya tevgerê ma yo. Wezîfe û berpirsîyarîya ke paweyê tevgerê ma de yî, giran î. Çimkî hedefê ma gird î. Hemra Atakan bi nê zanayîşî nizdî bi û mîsyonê xo bica ard. Ma zî ganî sey Hemra Atakanî wayîrê rol û mîsyonê xo bivejyî. Şar ma ra nînan paweno û wezîfeyê ma zî no yo. Ma do hemrayê ma Şahîn, Mercan, Delal Amede, Alîşêr Dêrsim, Ulaş Bayraktaroglu, Ulaş Adali, Nubar Ozanyan û Atakan Mahîrî xo vîra nêkerî û wayîrê xeyalanê înan bivejyî. Ma soz danî hemrayanê xo, wa tarîx bibo şahidê ma. Ma do zorê faşîzmî bîşêrî û hesabê vînîbîyayeyanê xo bipersî.”

 

ANF / BRUKSEL

 
 

Mîrasê Nubarî do bibo rêberê ma

   

Partîya Komunîstanê Maoîstan ya Rojawanî (MKP) serrgêra şehadetê 1. ya Nubar Ozanyanî de îzehetêko nuştekî daye. MKP-Rojawanî vato ‘Ma bi rêzdarî hemrayê xo Nubar Ozanyanî vîr anî’ û îzehetê xo wina domnayo: “Cesaretê ci yê mîlîtanî û zanayîşê ci yê şorişgêrî hertim do bêro finak girewtene û rayîr nîşanê ma bido. Hemra Nubar hertim seba bindestan têkoşîn da. Filistîn, Armenîstan, Kurdistan, Warê Pawitişê Medya û Rojawan de wezîfe kerd û vindetiş, cuye, cesaretê ci şorişgêran rê sey mîrasî mendî. Mîrasê Hemra Nubarî hertim do bibo rêberê ma.”