Fermandarîya YPJyî ya ke bi wesîleya serrgêra 3. ya qetlîyamê Şengalî îzehetêko nuştekî da. Îzehet de bale ancîyayo têkoşînê Bêrîvane, Şengale û Berxwedanan ser û wina ameyo vatene: “Ma sozê xo yê heyfgirewtişê cinîyanê Êzidîyan yê esîran reyna newe kenê. Ma do têkoşînê xo gird bikerê û ser bikewê.”
3ê Tebaxa 2014î de çeteyanê DAÎŞî bi hetkarîya xeylê hêzanê herêmî û mîyanneteweyî hêrişê Şengalî kerdî û bi hezaran kesî qetil kerdbî. Netîceyê hêrişan de bi hezaran cinî û domanî amebî remnayene û hêrişan ver bi deshezaran kesî mecbûr mendbî ke ca û warê xo biteriknî. Ewro serrgêra Qetlîyamê Şengalî yo.
Artêşa Îraqî, YBŞ-YJŞ û Haşdî Şabî ewro herêma Golatî ya Şengalî de vera çeteyanê DAÎŞ’î operasyon da destpêkerdene. Çimeyanê YBŞyî da zanayene ke no operasyon heman wextî de dewamê operasyonanê ke 11 û 26ê Temmuze de vera çeteyan de ameyî kerdene yo.
Fermandarîya YPJyî bi wesîleya serrgêra 3. ya Qetlîamê Şengalî îzehetêko nuştekî da û sozê heyfgrewtişê cinîyan ê Êzidîyan newe kerd. YPJyî îzehetê xo de vato ‘ma şexsê Gulçîne, Vînare, Şengale, Berxwedane, Canwelate û Zêrîn Qamişlo de heme şehîdanê Şengalî bi hurmet yad kenê û soz danê ke ma do xîyalanê şehîdan bica bîyarê’.
Tornanê Kawayî Asinkarî vera qetlîyamî de vindetî
YPJyî îzehetê xo de va ‘hêzê serdest û qetilkarî tarîxî ra nata vera Êzidîyan de bi desan qetlîyamî kerdî’ û wina dewam kerdo: “Heme qetlîyaman de rolê dewleta Tirkî gird bi. Vera herişanê ke îtîqat û kulturê Êzidîyan û Şengalo bimbarek hedef girewtêne, 2014 de çar leteyanê Kurdistanî ra Kurdan verê xo da Şêngalê bimbarekî û vera çeteyanê DAÎŞî de têkoşîn da. Tornanê Kawayê Asinkarî, şopdaranê Derwêş û Edûlê û hemrayanê Binevş Agale bi sondê heyfgirewtişî vera qetlîyamî de vindetî.”
Ganî têkoşîn bêro girdkerdene
YPJyî dîyar kerd o ke ewro bi piştîdayîş û hemkarîya PDKyî vera destkewteyanê Şengalî de reyna hêrişî yenê kerdene û wina dewam kerdo: “Hêrişê dewleta Tirkî yê vera Rojawan û Başûrê Kurdistanî û hêrişê vera Şengalî de yê 2014î pabesteyê yewbînan ê. Ganî vera hêrişanê kolonyalîstan têkoşîn bêro girdkerdene.”
Şar vera talanî de xo paweno
YPJyî îzehetê xo de vato ‘Êzidîyan ewro rayberîya Berîvane, Şengale û Berxwedanan de xo newe ra wela xo ra afernayo’ û îzehet wina qedîyayo: “Vera talanê şerî de ewro şarê Şengalî xo paweno. Çeteyanê DAÎŞî vera xoverdayîşê ma yê tarîxî de vînî kerd. Tewr peynî de hêzanê ma pîya bi hêzanê YPG û QSDyî hemleya qedênayîşê çeteyanê Dêrazorî de bi seyan cinî û domanê Êzidîyan xelisnayî. Ma sozê heyfgirewtişê Şengalî dabi, ma nê sozê xo bica ard. Ma sozê xo yê heyfgirewtişê cinîyanê Êzidîyan yê esîran reyna newe kenê. Ma do têkoşînê xo gird bikerê û ser bikewê.”
AMED