Hemserekê DBPê Amedî vatî ke DBP partîya ziwan û perwerdeyî yo, komelêko bi hîşyar bîyayiş ser o şerto ke heme rasteyê cuye de perwerdeyî bêro dayiş û perwerde tena mîyanê çar dêsî de nîno dayiş, partî zî perwerde ra rayberî kenê.

LÊL AMED / AMED

Rêxistinê Bajarê Amedî yê Partîya Herêmê Demokratîke bi şîara ‘Bi ruhê yewîyewa netewî ber bi komelo azad meşîyenî’ kongreya xo ya îstîsna ya 5’ine viraşt. Kongre ra zaf hûmarî de wekîl, partîyij, cenî û ciwan beşdar bîyê. Demserra newe de rolê DBPî taybetî organîzekerdişê perwerde û tifaqa netewî ser o bibo.  Kongre de hemserekî ra Seval Gulmez û Mehmet Bakir ameyî weçînayiş. Di hemserek projeyê xo yê newe û muhîmîya 21’ê Sibata Roja Ziwanê Dayîke ya Dinya ser o qise kerdê.

Vera polîtîkayê asîmîlasyonî verpersbîyayiş

Hemsereka DBPê Amedî Seval Gulmez vat ke ê arizî mintiqaya Kurdistanî ra û pêroyina de zî heme şaran ra cuyêka bi azad wazenî û wina vat: “Ma rêziknameyê partîya xo ser taybetî Kurdistan de xebat kenî la xebatanê ma, heme merdiman elaqadar kenê. Her kes eşkeno cuya xo de projeyê ma ca biko. Goreyê partîya ma, serekeyî estê, serekeya ma sifte vera ziwanê Kurdî û sewbî ziwanan ser o polîtîkayê asîmîlasyonî ra verpersbîyayiş o. Demê verpersî zî nasnameyê xo pawitişî û bi zereyê ziwanê xo zî vengnêkerdişî nê polîtîkayê asîmîlasyonî ra bendbîyayişê ser o ma xebityenê.”

Ma do her kesî hembez bikê

Hemsereka DBPê Amedî Gulmez aşkera kerd ke ê rasteyê perwerdeyî de xebatê bi arizî bikê û wina domna: “Demo ke şîroveyê merdimî û prosesî  ma dest gênî, ma vînenî ke perwerde avzelîyêka bi cidî yo. Eke ma wazenî komelêko bi azad, kêfweş de biciwî, ma ganî kesêkî bi hîşyar bibê. Kesêko bi hîşyar bîyayişî ser o şerto ke ma heme rasteyan de perwerde bivînê. Perwerde tena mîyanê çar dêsî de nîno dayiş û partîyan zî perwerde ra tena rayberî û seba verdewamîya perwerdeyî zî xebata înşayî kenê. Ma zî do înşaetkarê perwerdeyî bibê, vera polîtîkayê zayendperestî û cîyakerî zî ma do înşayê bi cuyêka birayî ser o tewir bi tewir raste de xebata perwerdeyî bikê. Na xebata xo zî ma do şarê reyde bikê, no ser ray ray ma panel, konferans organîze bikê. Ma do her kesî hembez bikê û her kesî ra zerrîya û hembezê ma akerde yê. Kam kî aştî wazena, hetê ma de cayê ci esto.”

Tifaqa netewî û ziwanê dayîke

Gulmez pare kerd ke Kurdistan de sewbî partî zî xebat kenê, Kurdistan de bi nasnameyê xo yê azad û ameyoxê bi omidî cuyekerdiş ser o ganîya ke heme partîyî bêrê têhet û proje awan bikê û wina dewam kerd: “Ma çarçiweya bi ruhê netewî heme partî û STKyan reyde kombîyayişê bi hembar bivirazê û platforman awan bikê. Ma do heme kes û dormera ra şîrove bigê û no zî do bibo semedê awanîya platformê demokrasîye. Kurdistan DBP û HDP tena partîyêka Kurd nîyê, sewbî partî zî Kurd î, no ser persgirêkê Kurd ma hemin o. Polîtîkayê asîmîlasyonî taybetî gede û cenî ser de yenî şuxilnayiş û no ser ma do baldar bibê.”

Gulmez bal ont 21’ê Sibata Roja Ziwanê Dayîke û wina qedîna: “Domanî sifte ziwanê xo, dayîka xo ra musenê, no ser averberdişê ziwan û kultirî de rol û mîsyonê cenî bi muhîm o. Çi heyfo ke UNESCO û AÎHM vera polîtîkayê asîmîlasyonî bêveng î, no ser nika Dinya de zaf bi ziwanê binê asîmîlasyonî de yê. Ganî şar ziwanê dayîka xo ra wayîr bivejo û bido cuyakerdişî.”

Vera ziwanê Kurdî qedexeyê bi giran

Hewna Hemserekê DBPê Amedî Mehmet Bakir zî ard ziwan ke ê taybetî arizîya mintiqaye ser o do xebat bikê, heme dormera ra dayişê perwerdeyî ser o do perwerdekaran biresnê. Pare kerd ke peynîya perwerdeyî do zaf hûmarî de rasteyê sîyasetî ra qadroyan biresî û xebat bikê, ê taybetî xebatanê tifaqa netewî ser lez bidê û seba averberdişê têkoşîn bidê. Aşkera kerd ke eke ê armancê xo yê sereke bivirazî do kesê ke bi bextewar bibê. Hemserekê DBPê Amedî Bakir seba 21’ê Sibate ser o wina vat: “Heme ganî bi ziwanê xo estê, no ser zî heqê şarê Kurd û Dinyaye esto ke bi ziwanê xo, perwerdeyî bivînê û bişuxilnê. Çi heyfo ke verê ziwanê Kurdî de qedexeyê bi giran estê, ma do vera qedexeyan têkoşîn bidê û averberdişê ziwanê Kurdî ser o zî xebat bikê.”