BÎLAL GULDEM / DÎHABER/AMED
Kedkarê ke bi Qerarnameyê Hukmê Qanûnî (KHK) karê xo ra ameybî îxraçkerdiş û nika sewbîna karan kenî, derheqê 1ê Gulane Roja Karkeranê Cihanî de qisey kerdî.
Kedkaran ra Umît Çetînero ke Pisprê Xizmetanê Sosyalî bî û bi KHK karê xo ame îxraçkerdiş û nika kafeyêk dano xebetnayîş, va ‘vera kedkaran de planêk yê tasfîye erzîyaya dewre’ û wina domna: “Nika sîstemî heme waran qedexe kerdo. Ez veng dana heme embazanê xo yê ke ameyî îxraçkerdiş, wa 1ê Gulane de rasteyan de bibî.”
Ma do pîroz bikerî
Hemsereka Sendîkaya SESî ya Şûbeya Amedî Selma Atabeya ke ameybî îxraçkerdiş zî wina va: “Her çiqas ke hende astengî û şer estbî zî, ma 8ê Adare û Newroze pîroz kerd. Cok ra ma do 1ê Gulane zî pîroz bikerî. Se beno wa bibo, mîtîng daxî nêvirazîyo zî ma do sey kedkar, dewij, wendekar û cinî bêrî têhet û 1ê Gulane pîroz bikerî.”
Eylem Tepe Ulgene ke Merkezê Cinîyan yê Ekîn Cerenî de xebetîyayêne û hetê qayûmî ra kar ra ameye îxraçkerdiş, zî wina va: “Êdî mumkin nîyo ke merdim mîyanê komelî de merdimêko bextewar bivîno. Ma prosesêko xirabin ra derbaz benî. Ganî ma rasteyan de bibî û bi hawayo xurt 1ê Gulane pîroz bikerî.”
Vatişê ma zî esto
Mamosta Mehtap Yoruka ke ameybî îxraçkerdiş û dima ra nihê û birinc roşena zî têkoşînê xo yê kede domnena. Yoruke wina va: “Prosesêko keda kedkar û karkeran yena dagîrkerdiş de ma reyna pey keda xo de vindetî û nê vindetişê xo zî domnenî. Ganî ê xo vîra nêkerî ke cayo ke tede neheqî bibo, ewja de vatişê ma zî esto. Cok ra ma do 1ê Gulane de rasteyan de bibî.”