Partîya Herême ya Demoktratîke (DBP) bi sloganê ‘Komela ke roşin biba, azad bena’ Kongreyê xo yê 4. viraşte. Dayîka Mehmet Yavuzelî Hanim Yavuzele û cinîya Mehmet Tunçî Zeynep Tunçe beşdarê kongre bîyî û seba berzkerdişê têkoşînî veng dayî.
Wa bêro rayîro raşt
Hanim Yavuzele hayr ant qirkerdişê Cizîr ser û wina va: “Serê ma berz o û bawerîya ma esta. Cêrzemînê wehşetî, cêrzemînê merdimîye nîyî. Ez na dewlete û kesê ke qetlîyaman kerdî şermizar kena. Wa şarê ma bêro rayîro raşt û zerrîya ti dayîkî nêvêşo. Wa her kes seba domananê xo têkoşîn bido. Êdî wa Mehmet, Sêvê û Fatmayî nêrî qetilkerdiş. Rijnayîşê bajaran hema zî dewam keno. Sebebê rijnayîşan nasnameyê kurdîbîyayîşî yo. Çimkî tehemulê kurdan nêkenî. Heta ke dalpeyêk gonîyê ma bibo ma do rayîrê Mehmet, Sêvê û Pakîzeyan de bişî.”
Netîceyê kurdbîyayîşî zindan o
Zeynep Tunçe zî hayr ant xoverrodayîş û têkoşînî ser û wina va: “Ez Kongreya Asayî ya 4. ê DBP pîroz kena. Heme hemserek û îdarekarê ma tewqîfkerde yî û zîndanan de yenê tepiştiş. Keso ke vajo ez kurd a, erzîyeno zîndanan. Ma nêwazenê ke kesêk bierzîyo zîndan.”
ŞÛJIN/ANQARA