Xebatê weçînayîşê 2019î yê Vakurê Kurdîstan û Tirkîya nika ra ameyî destpêkerdene. Vizêr tarîxê weçînayîşan sey 31ê adare ame dîyar kerdene û rojnameyo fermî de zî no tarîx ame weşanayene. Endamê Merkezê Partî ya Herêmanê Demokratîke (DBP) yê Edene Erdol Demîrhanî weçînayîşê herêmî ser o qisey kerd.
Demîrhanî dîyar kerd ke peynîya serra 2016î de hukmatê AKPyî qeyûm tayînê 96 şaredarîyanê DBPyî kerd û wina va: “No îradeyê şarê kurdî rê zî qeyûm tayînkerdiş o. Îradeyê şarî û waştişê şarî yê xo bi xo îdarekerdiş nîno dîyayene. Coka weçînitişê herêmî yê 2019î seba ma zaf muhîm o. Ganî ma zaf bixebitî. Ma do bi heme hêzê xo yê rêxistinkerdeyî hem şaredarîyê ma ke ameyî xespkerdene hem zî nînan ra zafêr reyna qezenc bikerî.”
Demîrhanî da zanayene ke yê do HDP bikewî weçînitişê herêmî û wina domna: “Weçînayoxê HDPyî her ca de estî la cayê ke kurdî zaf ê, nê cayan de îddîaya ma hîna gird a. Edene zî sereyê nê bajaran de yena. Tîya de nizdîyê 2 mîlyonî kurdî estî. Qezayanê sey Ceyhan, Yuregîr û Seyhan, Mersîn de zî Akdenîz û Torosan de kurdî zaf î. Tena kurdî nê hetê çep, sosyalîst û demokratan a pîya yê ke polîtîkaya AKPyî ra eciz bîyê, yê zî nê prosesî de vanî HDP. HDP weçînayîşê herêmî de her hetî ra omid dana şaran.”
ANF / EDENE