DENÎZ ÎKE / ANF/ WAN
Nizdîyê 19 serrî yo ke Rayberê Şarê Kurd Abdullah Ocalanî ser de tecrîdêk yeno bicaardiş û no tecrîd bitaybetî çend serranê peyênan de ameyo girankerdiş û Ocalan yeno îzolekerdiş.
Xusûsen çend hewte verê ser medyaya komelkî de derheqê Ocalanî de tayê xeberî ameybî parekerdiş. Parekerdişê xeberan ra dima etirîyayîşê kurd û dostanê kurdan zêde bîyo. Kurdî û dostê ci xeylê cayanê dinya de seba ke xeberêk Rayberê xo ra bigîrî, payan ser de yî.
Kurdî seba weşî, ewleyî û azadîya Ocalanî çalakîyan virazenî. Babete ser o wanijî qisey kerdî û vera tecrîdî de reaksîyon nîşan dayî. Bi nameyê Guler Avciye de yew cinîye va ‘tecrîd nîno qebulkerdiş’ û wina domnaye: “Ez veng dana CPT û AÎHMî ke wa cewab bidî waştişê kurdan. Birêz Ocalan rayberê dinya yo. Wa herkes biwerzîyo payan ser.”
Ocalan temînatê aştîye yo
Haydar Tenîkî zî dîyar kerd ke Ocalan seba biratîya şaran temînatê aştîye yo û wina va: “Şexsê Ocalanî de şar yeno tecrîdkerdiş. Qanûn û huqûq bin lingan de yî. Ti feydeyê tecrîdî hukmat û ti kesî rê çin o.”
Welatîyan ra Îkram Cengîzî va ‘tecrîdo ke Ocalanî ser de yeno bicaardiş, zaf tehlukeyin o, cok ra ganî ma vera tecrîdî de bivejyî, sewbîna ma do se bikerî?’.
Siddik Kandemîrî zî veng da rayapêroyî û va ‘ganî her kesê ke wayîrê wijdanî yo, biwerzîyo payan ser’ û wina dewam kerd: “Ma heme pawe yî ke xeberêk Ocalan ra bêro. Ma bawer kenî ke bi wedarnayîşê tecrîdî do çareserî pê bêro.”
Tecrîd sucê merdimîye yo
Yucel Yavuz Agaogluyî zî da zanayîş ke tecrîd tena ser Ocalanî de nê, ser şarê kurd de zî yeno bicaardiş. Fesîh Bozkayayî zî va ‘Tecrîdo ke birêz Ocalanî ser de yeno bicaardiş, sucê merdimîye yo’ û wina domna: “Heta ke tecrîd nêro wedarnayîş, ma do waran de bibî û ma do xover bidî.”
Hatîce Yildize zî wina va: “Tecrîdo ke Rayber Apoyî ser o yeno bicaardiş, ser cinîyan de zî beno. Ma wazenî wa Birêz Ocalan azade bibo. Nizdîyê 2 serrî yo ke ma Ocalanî ra xebere nêgênî. Ma wazenî keye, avûkat û heyet şêrî pêvînayîş bikerî. Heta ke tecrîd bidomîyo, do welat de kaos zî aver şêro.”
Hasan Arslanî zî ard ziwan ke tecrîd ti qanûnê dinya de çin o û ganî lezabez avûkat û keyeyê Ocalanî şêrî Îmrali û ma tira xeberêk bigîrî.