Hemsereka Pêroyî ya DBPyî Sebahat Tuncele û Hemsereka Pêroyî ya HDPyî ya kehen Fîgen Yuksekdage seba dayîka Hatun Tugluke û Dayîka Şeme Guzel Şahîne ke 2 rojî verê wefat kerde, mesajê serweşî erşawitî.
Mesajo ke Sebahat Tuncele erşawitbî, wina bî: “Ez musaya ke dayîka Guzele wefat kerda. Hîna ez hêrişo ke cenazeya Dayîka Hatune rê bî ver eciz bîyêne, na rey zî mi xebera wefatê Dayîka Guzele girewt. Dayîka Guzele her tim vera zulm, faşîzm û neheqî de têkoşîn dayêne û zerrîya aye bi eşqê azadî pirr bîye. Dayîka Guzele her çalakîye de ca girewte û rayîr nîşanê ma daye. Ma soz danî dayîka Hatune û Dayîka Guzele, ma do azadî, demokrasî û aştî de israr bikerî.”
Dayîka welatperweran bîye
Yuksekdaga ke Zîndanê Tîpa Fyî yê Kandira de manena zî mesajêk erşawite û mesajê xo de dîyar kerde ke dayîka Guzele her tim bîya embaza înan. Mesajê Yuksekdage wina wina dewam kerdo: “Dayîka Guzele heta nefesê xo yo peynî zî her tim payan ser de bîye û beşdarê çalakîyan bîye. Dayîka Guzele dayîka heme şorişgêr, pawitoxê heqê merdiman, welatperwer û sewbîna bîye. Ez Dayîka Guzele biminet silam kena. Ez seba heme laj û kênayanê Dayîka Guzele rê serweşî wazena. Ma do sey hepsîyê sîyasî têkoşîno ke Dayîka Guzele ma rê mîras verda, biresnî serkewtişî.” n AMED