Mufredato newe ke hetê Wezîrîya Perwerdeyî yo Mîlî ra emser erzîyeno dewre ser o heta nika zaf hetan ra reaksîyonî ameyî. Seba ke mufredat bi zîhnîyetêko tekperest ameyo amadekerdiş, cinîyî, elewîyî û sewbîna zaf hetan vera mufredatî de reaksîyon nîşan dayî/danî.
Babete ser o Sereka Pêroyî ya Egîtîm-Senî Feray Aytekîn Aydogane û Hemsereka Egîtîm Senî ya Şûbeya Wanî Muazzez Orhane qisey kerdî.
Aydogane va ‘serra 2013î ra nata ma tim bi mufredatanê kehenperest, nîjadperest, cînsîyetperest û sewbîna rî bi rî manenî’ û wina dewam kerde: “Heqê domanê feqîran yê perwerdeyî seba ke mektebanê dewlete rê butçe nîno cîyakerdiş, yeno astengkerdiş. Reyna hîna mekteban de laboratuar, kitabxane û atolyeyê hunerî kemî yî, labelê goreyê qanûno newe do her mekteb de mescîdî biabî.”
Vernîya îstîsmarî heta peynî abîyo
Aydogane qiseykerdişê xo de qala peymanê ke bi Weqfê Ensar, Cemîyetê Îlîm Yayma, Weqfê Ilmî û sewbîna ameyî kerdiş, kerde û wina va: “Wezîrîye bi nê peymanan tayê wezîfeyanê xo dewrê nê dezgeyan kerdo. Bi no hawa vernîya îstîsmarî heta peynî ameyo kerdiş. Mufredat nîjadperest û cîyakar o. No mufredat goreyê tekperestî ameyo amadekerdiş. Ser de her roje embazê ma îxraç benî û yenî surgunkerdiş. Labelê se beno wa bibo, ma do teslîmê tarîtî nêbî.”
Ma do têkoşînê xo bidomnî
Hemsereka Egîtîm Senî ya Şûbeya Wanî Muazzez Orhane zî va ‘Wezîrîye bi mufredato newe perwerdeyî de dînî veto aver’û wina domnaye: “Wezîrîye heme butçe seba mektebanê taybetan cîya kerda û no zî beno sebeb ke domanî bi hawayo seyyewbînan perwerde nêvînî. Seba ke ezmunê TEOGî esto, domanê ke nêwazenî şêrî îmam xatîban, mecbûr manenî şêrî ewja. Mufredato newe de mefhûmê cîhadî esto û no mefhûm ver merdim etirîyeno. Goreyê mufredato newe karê cinîye xizmetê camêrdî kerdiş o. Îqtîdar seba ke polîtîkayanê xo bido roniştiş, wina keno. Labelê ma do têkoşînê xo bidomnî û probleman rayapêroyî rê aşkere bikerî.”
STENBOL/WAN