Hepisxaneyanê Tirkîya de OHALî ra dima hepsîyî her ke şono hîna zaf rastê zext û tedayan yenî. Hepisxaneyê Tîpa Cyî yê Cinîyan yê Tarsusî de derheqê îxlalê ke yenê cuyayîş cinîyê hepsîyî mektubêk erşawitî. Cinîyan mektube de vato ke îdareyê hepisxaneyî bi polîtîkayanê neweyan, hepsîyan rê teda kenê û neheqîyan ver ê do ewro ra tepîya nêvejyî pêvînayîşan.
Mektuba ke cinîyê hepsîyî bi mabênkarîya avûkate Sevîl Aricîye erşawitbî de wina yo:
“Embazê ma yê cinîye û kedkarê Şûjino ke vengê cinîyan o. Sey ke şima zî zanî, her cayê Tirkîya de vera cinîyan de zext, teda, tacîz û îşkence yenî kerdiş. Rojêk de tewr kêmî 5 cinîyî yenî qetilkerdiş. Ma vera zîhnîyetê camêrdîyo ke cinîyan rê heqê cuyayîşî nêdano de her tim rasteyan de bîy û ma do têkoşînê xo bidomnî zî. Ma nika mehkemekerdişêko neheq û nêadil reyde rî bi rî yî.
Raştîya xo de ê hepsî yî û yê ke azad î, ma yî. Bado ke prosesê aştî ame wedarnayîş û polîtîkayê hukmatî yê şaş, rewşa welatî orte de ya. Ma her roje cuyayîşî pawit û her roje raştîya rastikêne yê şerî vet orte. Reyna wexto ke ma va ‘destê xo domanan ra biancê’ ma zîhnîyetê tecawizkarî teşhîr kerdênê. Seserrî zî derbaz bibî, ma do vera zîhnîyetê camêrdî de têkoşînê xo bidomnî.
Ma nika koguşê ke seba 40 kesan ameyî viraştiş de 85 kesî manenî. Her çiqas ke reaksîyonanê ma ver vatî ma do koguşanê neweyan bidî şima, reyna zî nika bi hawayêko bîn zext û tedayan ma ser de erzenî dewre. Ma ra vanî ‘eke şima rê koguşê neweyî bêrî akerdiş, o wext do kamerayî bêrî pakerdiş û ma tehdît kenî. Nika hewteyêk de tena 3 mektubî yenî dayîş û no zî ma dekeno zorî.
Her çiqas ke ma dîyar kerd ke ma nê neheqîya qebul nêkenî zî, ma ra vanî ‘OHAL esto’ û domnenî. Se beno wa bibo, ma do sere nêronî. Her şert û mercî de ma do têkoşînê xo bidomnî.”n ŞÛJIN /MERSÎN