Şewatê daristanan ke Dêrsim de merkez û qezayanê Pulur, Qisle, Pîlemurîye, Xozat û Mazgîrd de 27 nuqtayan de netîceyê bombevarnayîşê helîkopter û topê hewanan de vejîyabî, peynîya 15 rojan de hewldayîşê welatîyan û varayîşê varanî ra dima merd.Dêrsim de bi veşayîşê daristanan tewirê gandarê ke neslê înan çinî beno zî veşayî. Herçiqas ke xeyle cayan de leşkeran asteng kerd, reyna zî zaf cayan de welatîyan astengîyan derbaz kerdî û mudaxaleyê şewatî kerdî. Bi merdişê şewatî ra dima ameyêne, cayê hedîseyî de cigêrayîş kerdî. Heyet do raporêk aşkere bikero. Aktîvîsta Tebîetî Pinar Yîgîtogullariye va ‘netîceyê cigêrayîşî de ma dî ke 550 hektar daristan bîyo wele û goreyê dewijan şewat netîceyê pêrodayîşî de nêvejîyayo’ û wina dewam kerde: “Îzeheto ke walîtî dayo, raşt nîyo û şewat hetê leşkeran ra ameyo vetiş.”
Ma do awan bikerî
Aktîvîstê Tebîetî ra Haydar Çetînkayayî zî dîyar kerd ke bi hawayo rew mudaxaleyê şewatî nêameyo kerdiş û wina va: “Sey her serre, emser zî netîceyê bombe û muhîmatanê bînan de vejîya. Ma tayê cayan de nêverda şewat hîra bibo, labelê tayê cayan de zî leşkeran asteng kerd. Ma do nika ra pey vera şewatê daristanan de bi hawayo seferberî hereket bikerî. Ma do seba ke erey nêmanî, bi hawayo profesyonel mudaxaleyê şewatî bikerî.”
Tebîetî mirêna
Parlamenterê HDPyî yê Dêrsimî Alîcan Onluyî zî va ‘7 qezayan de pêreyde şewatdest pêkerd û walîtî zî îzehetê xo de zuran kerde’ û wina domna: “Sifteyîn va ‘çîyêko winasî çin o, zaf gird kenî’. Bi no hawa hewl da ke vernîya kombîyayîşê şarî bigîrî. Labelê badê bi hewldayîşê şarî îzehetê walîtî zure vejîya. Yew dest şewatan vejeno, labelê destê ke mirênenî zaf î. Şewat netîceyê xoverdakarîya tebîetî merd.”
Yena qetilkerdiş
Parlamentera HDPyî ya Stenbolî Huda Kayaye zî va ‘ma na manzara ver şaş mendî’ û wina domnaye: “Dêrsim de bi şewatan hewl dayî tecawizê pîrozîyanê Dêrsimî bikerî. Rêzdarîya ke vera gandaran de esta ameye qetilkerdiş. Tewr zaf Dêrsim de vera tebîetî de rêzgirewtiş esto. Ewro hewl danî nê tebîetî qetil bikerî. Ewro ma elewî, sunî, ermenî, xirîstîyan heme vera faşîzmî de mîyanê piştîdayîşî de yî. Ma do wayîrê tebîetê xo bivejyî û piştî bidî yewbînan.”
LEZGÎN AKDENÎZ/DÎHABER/DÊRSIM