Hewteyo verên bi Qerarnameyê Hukmê Qanûnî (KHK) yê hûmara 689î 17 akademîsyenê ke îmze eştbî binê vilaweka aştî, Unîversîteya Dîcle ra ameybî îxraçkerdiş. Polîsan eştbî keyeyanê akademîsyenan ser û akademîsyenan tepiştî. Akademîsyenan wextê tepiştişî de qerarê îxracî musayî. Babete ser o akademîsyenê ke îxraç bîyî, qisey kerdî.
Yrd. Doç. Dr. Zekî Kana 23 serrî yo ke Unîversîteya Dîcle de Beşa Fîzyolojî de wezîfedar o. Kanayî wina va: “Hewl danî şarî ser de ters awan bikerî û merdiman yewbînan ra cîya bikerî. Wazenî merdim û zanayîşêko tek tîp xelq bikerî. Ê wazenî ke wa tena tek fikir bibo. No qerar eynî wext de akademîsyenanê bînan rê zî sey tehdîtêk o. Ganî akademîsyenî nêtersî, çiqas tehlukeyin beno wa bibo, ma do xover bidî. Heme dinya zano ke îxraçbîyayîşê akademîsyenan raşt nîyo. Ma bi têkoşîn û çalakîyan eşkenî nê îxracan bivindarnî.”
Kitabê ma de çin o
Kanayî dewamê qiseykerdişê xo de va ‘roja ke bîyo îqtîdar ra nata, AKP tim komelî ser de polîtîkayanê zextî meşneno’ û wina dewam kerd: “Verê cû derheqê mi de 6 tehqîqatî ameyî akerdiş, la mi qet sere nêrona. Mi tim vera nînan de xover da. Nika ziwanêko şêrîn yeno xebetnayîş, labelê jehrê ci tehl o. O wext zî ez tim bi erzîyayîşî reyde rî bi rî bîya. Her çiqas ke ma ameyî îxraçkerdiş, reyna zî ma do bîat nêkerî. Çîyêko winasî kitabê ma de çin o. Se beno wa bibo, ma do bi rayîr û tarzê cîya-cîyayan xelqkerdişê xo bidomnî.”
Ma do biagêrî
Prof. Dr. Fîkret Uyar zî 28 serrî yo ke Fakulteya Fen Edebîyatî de Beşa Bîyolojîyo Molekulerî de ders dano, va ‘akademîsyenî tena unîversîteyan de nê, eynî wextî de mîyanê şarî de yî zî’ û wina domna: “Ma tena sinifan de ders nêdanî, bi wendekaran reyde mîyanê şarî de problemanê şarî rê çareserî zî gêrenî. Cok ra yo ke unîversîteyî cayê ke tede îlm yenî xelqkerdiş î û ganî no kar cayanê tengan de nêro kerdiş. Ma do bi tesilî peyser biagêrî.”
Prof. Dr. Yilmaz Turgut zî 22 serrî yo ke Beşa Kîmyaya Organîke de wezîfedar o. Turgutî va ‘badê ke ma tepişîyayî û serbest veradîyayî, ma lojmanan ra ameyî vetiş’ û wina dewam kerd: “Wexto ke mi tepiştî, domanê mi bêmaben berma. Çîyê ke ameyî sereyê ma neheq û bêhuqûqî bîy. Şima bi serran tîya de yî û tayê kesî yenî, şima ra vanî ‘ganî şima şêrî’. Labelê ma xoverdayîşê xo bidomnî û çarçewaya huqûqî de pawitişê heqanê xo bidomnî.”
Cewher de çin o
Turgutî peynîya qiseykerdişê xo de wina va: “Tena sebebê tepişîyayîşê ma îmze eştişê vilaweka aştî bî. Dewlete waşt çimê ma bitersna. Bîatkerdiş teberê cewherê akademî de yo. Waştişê înan o yo ke ê ke bîat nêkenî, unîversîte ra bierzî. Eke şima bîat bikerî, şima nêşênî çîyêk xelq bikerî. Çimkî çîyê ke şima xelq kenî, vera sîstemî de yo. Ma unîversîteyan de dersê cuye danî wendekaranê xo, labelê ê bi çimê ma nêewnîyenî.”
BÎLAL GULDEM/SONYA BAYIK / DÎHABER/AMED