Heyetê Pêroyî yê 8. yê Kongreya Demokratîke ya Şaran (HDK) Anqara de Plaza Otelî de kom bî. Tirkîya û Kurdistan ra xeylê delegeyî, Hemsereka Pêroyî ya HDPyî Serpîl Kemalbaye, Hemserekê KCDyî Leyla Guvene û Berdan Ozturk, Parlamenterê HDPyî, KESK, EMEP, SYKP, Hereketê 78an, TTB, ÎHD, Kongreya Îslamî ya Demokratîke, Komeleyê Elewîyanê Demokratîkan û sewbîna xeylê partîyê sîyasî û rêxistinê komelî yê sîvîlî beşdarê kongre bîyî.
Salone de pankartê ke bi kurdî, tirkî û armenîkî ‘Bi meclîsan ver bi demokrasî, bi komara demokratîke ver bi azadîye’, ‘Vera faşîzmî de yewbîyayîş, komara demokratîke rê azadîye’, ‘Cuye sermaye ra hîna qewetin a, rijnayîşo ekolojik polîtîk o, seba tebîetî azadî’, ‘ma vera faşîzmî de sere wedarnenî’ û sewbîna ameyî aliqnayîş. Kongre bi weçînayîşê endamanê dîvanî dest pêkerde.
Verfekê HDKyî Onur Hamzaogluyî qiseykerdişê destpêkî kerd û heme kesê ke heta ewro têkoşîn dayî rê sipas kerd. Hamzaogluyî bal ant OHALî ra dima hêzê paramîlîterî ke hetê AKPyî ra ameyî awankerdiş ser û wina va: “Ma kongreya xo serra 100. ya Şorişê Teşrîna verêne de virazenî. Donemo newe de do buroyê ma bibî û ma do hîna zaf melumatan xelq bikerî. Ma do bi mektebanê HDKyî bimeşyî. Nê mektebî do muhtewaya komara demokratîke dîyar bikerî.”
Heto bîn ra Hemsereka Pêroyî ya DBPyî Sebahat Tuncele, Hemserekê Pêroyî yê HDPyî Selahhattîn Demîrtaş û Hemsereka Pêroyî ya HDPyî ya kehene Fîgen Yuksekdage zî mesaj erşawitî.
Mesajê Tuncele hetê Endama Dîvanî Gulseren Pusatliye ra bi tilîlî û sloganê ‘Cinî cuye azadî’ yê cinîyan ame wendiş. Tuncele destpêk de heme beşdarkaran silam kerde û wina va: “Heta ke problemê Kurdistanî çareser nêbî, heta ke problemê heq û azadîye nêrî çareserkerdiş, ma nêşênî qala demokrasî, azadî û aştîyêka raştikêne bikerî. Pîya cuyayîş ancax bi awankerdişê komara demokratîke mumkin o. Pîya têkoşîn dayîş, hêzêko gird awan keno. Ma senî ke Rojawan de vera polîtîkayê şerî ke vernîya biratî, seyyewbînanî û azadîya şaran de bîyênê asteng de vindetî, ma wazenî tîya de zî wina bikerî. Ewro Îmrali de şexsê Birêz Abdullah Ocalanî de tecrîdêk esto û no tecrîd raştîya xo de vera azadî û aştîya şaran de yeno domnayîş. Seba wedarnayîşê tecrîdî qerarê ke na kongre de bêrî girewtiş, muhîm î. Bi hêvîya ma do ameyoxêka azade de yewbînan bivînî.”
Ma do faşîzmî birijnî
Hemserekê Pêroyî yê HDPYî Selahattîn Demîrtaşî zî mesajêk erşawit û dîyar kerd ke faşîzmê AKPyî û rejîmê OHALî hewl danî heme komelî bi tersnayîş esîr bigîrî û wina dewam kerd: “Rojê winasîyan de rêxistinebîyayîş zaf muhîm o. Herçiqas ke KCD û HDK hetê rejîmê faşîstî yê AKPyî ra bêrî terorîzekerdiş zî, ma do hîna zaf wayîrê xebatanê înan bivejyî û ameyoxa pîyacuyayîş û aştîye awan bikerî. Ez bawer kena ke na kongre de do HDK kêmanîyanê xo derbaz bikero. Ma do faşîzmî birijnî û têkoşînê xo biresnî serkewtişî.”
NAVENDÊ XEBERAN