Qezaya Soma ya Manîsa de merdimê karkerê madenî ke 3 serrî verê cînayetê karî ver merdbî, derheqê prosesê referandûmî de qisey kerdî û vînayîşê xo ardî ziwan.
Şerefattîn Akbuluto ke cînayetê karî de lajê xo Mahmut Akbulutî vînî kerdbî, wina qisey kerd: “Mi bi serran reya xo dayêne AKPyî. Badê cînayetê karî ke Soma de qewimîya, mi fam kerd ke AKP zuran keno. Ma do kesê ke nê dejî bi ma dayî cuyayîş rê vajî nê.” Gulfîdan Koseya ke mêrdeyê xo Erdogan Koseyî cînayetê karî de vînî kerdbî, wina va: “Wexto ke karê zîretî qedîya, ma mecbûr mendî ke madenan de bixebetyî. Ewleyîya karkeran çinêbî û piştîya karkeran ra bi trîlyonan pere qezenç kerdî. Ma nînan qet xo vîra nêkenî. Ez do seba mêrdeyê xo vaja nê.”
Wa cehenimê înan bo
Fatma Ozguna ke mêrdeyê xo Aydin Ozgunî vînî kerdbî, qisey kerde û wina va: “Seba qezencê xo bi seyan canê ma merdî û yê ke înan ra dima mendî zî bi dejê înan her roje hêdî hêdî mirenî. Hetê Rojhelat de zî seba Sîstemê Serekî bajarî ameyî xirakerdiş û bi hezaran merdimî ameyî kiştiş. Ez tîya ra vana, wa Serekîya înan cehenimê înan bo.”
Kezban Ozgura ke cînayetê karî ver lajê xo Osman Ozgurî vînî kerdbî zî wina va: “Her ke ez yena keye, ez vana qey lajê mi keye de yo. Merdim nêeşkeno nê dejî tarîf bikero. Yê ke nê dejî bi ma dayî cuyayîş, ez hêvî kena ke wa bi hezaran qatê ci bicuyî. Bi çi hawayî do ma ra bêrî reyan biwazî. Yê ke ma qetil kerdî, wa ma ra rey nêwazî. Ez do vaja nê.”
MANÎSA