Zext û tedayê ke çapemenî û rojnamegeran ser de estî, nêqedîyenî. Tewr peynî Muxabîrê Ajansê Xeberan yê Dîcle (DÎHA) ke bi Qerarnameyê Hukmê Qanûnî de (OHAL) amebî padayîş, Nedîm Turfento ke 13ê gulana 2016î de amebî tepiştiş rê 22 serrî û nîme ceza ameyêne waştiş.
Roniştişê 5. yê doze de bi îdîaya ‘endamê rêxistine bîyayene’ 8 serrî û 9 aşmî ceza dîyaye Turfentî. Turfentî mehkeme de dîyar kerd ke 24 kesî ser mi de îfade dayî, labelê nînan ra 19 kesî şert û mercê îşkenceyî de dayî, 3 kesî orte de çin î û 1 zî nimite yo. Babete ser o rêxistinê meslekê çapemenîye reaksîyon nîşan dayî.
Serekê Pêroyî yê DÎSK Basin-Îşî Faruk Erenî va ‘herkes zano ke Nedîm rojnameger o û rojnamegerîye ra yeno mehkemekerdiş’ û wina dewam kerd: “Roja ke ceza dîyaye Nedîmî, mehkemeya Reîna zî estbî. Aye mehkeme de yewî vatbî ‘ez cîhadkar a, her ca de şer kena’ labelê reyna zî o kes ame tehlîyekerdiş. Merdim nêşêno na nakokîye fam bikero. Nedîm Stenbol de nêameyêne mehkemekerdiş, cayêko dur de mehkeme bîyêne. Mehkeme nêwaşte rojnamegerîya Nedîmî bivîno. Ma hêvî kenî ke yargitay de xira bibo.”
Wazenî rojnamegeran teslîm bigîrî
Temsîlkarê Şûbeya Stenbolî ya Komeleya Rojnamegeranê Hemdemî (ÇGD) Ugur Guçî zî dîyar kerd ke no qerar qerarêko hetê hêz, dozger û hakimanê taybetan ra ameyo dayîş o û wina va: “Wazenî rojnamegeran teslîm bigîrî.”
Serekê Pêroyî yê Sendîkaya Rojnamegeran ya Tirkîya (TGS) Gokhan Durmuşî zî wina va: “Ma sey TGSyî na doze sere ra heta peynî taqîp kerd. Hende îfadeyê şahidan estbî, labelê reyna zî ceza dîyaye Turfentî. Tîya de yeno famkerdiş ke huqûq xoser nîyo, eke huqûq xoser bibîyêne, ganî ceza nêdîyayêne Turfentî. Labelê rojnamegerî do heta peynî viraştişê xeberan bidomnî. Wa no qerar betal bibo.”
MA / STENBOL