Temsîlkarê sazî û partîyê kurd vatî ke peynîkerdişê Pêameyişê Sky-Pîcotî tifaq şert o, eke tifaqa kurdan bibo do kurdan bibê wayîrê ziwan û kultirî û waştişê şar koçberî û qetliamî ra xelisbîyayişî yo.
LÊL AMED / AMED
Amed de bi beşdarîya sazîyê partî û sazîyê sîvîl komxebata tîfaqe ame viraştiş. Komxebate 2 rojê domya û seba averşîyayişê tifaqe zî do komîsyonêk bêro awankerdiş. Komxebate ra Endamê PMî yê HDPî Eşref Mamedoğlu, Endama Desteya DBPî Zeynep Uren, Sekreterê Komela Şêx Seîdî Felat Ozsoy û Xebatkara DÎKî Dîlan Aydin beşdarê bîyê. Rojnameya ma ra averberdişê tifaqa kurdan ser o qise kerdê.
Endamê PMî yê HDPî Eşref Mamedoğlu vat ke şerto ke seba peynîkerdişê Pêameyişê Sky-Pîcotî kurdan tifaqa xo awan bikê û wina vat: “Eke Rojhelatê Mîyanên de tay averşîyayiş û bedilyayişêk bibê, verba nê averşîyayişan eke tifaqa kurdan bibo do kurdan bibê wayîrê herre, ziwan û kultirî. Eke yewîyeya kurdan nêbo do kam sazî, partî, rêxistin çiqas serkewt bibê zî Rojhelatê Mîyanên de do encax seyî ra 50 wayîrê serkewtişî bibê. Waştişê şarê kurd binê koçberî û qetliamî ra xelisbîyayişî yo.”
Endamê PMî yê HDPî Mamedoğlu bal ont yewîyeya şaran û wina peynî kerd: “Eke kurdan yew bibê do Rojhelatê Mîyanên de cuyaya hembar û konfederal do awan bikê. Eke yewîyeya kurdan serkewt bibo do seba şarêkê binê zilmê dîktatorî û netewperestî de cuyenê ra zî bibo mîsal. Waştişê kurdan yewîye û tifaqe yo, no ser destê ma ra çi bêro ma do bikê.”
Endama Desteya DBPî Zeynep Uren zî pare kerd ke tecrubeyê ke bi serran ê tevgerê Kurd û Kurdistanî cuyakerdeyî estê û wina domna: “Hem şarê Kurd hem zî tarîx ferz keno ke tifaqa kurdan şert a. Yewîyeya partî, oldar, partî û tarîxzanê kurd ganî ya. Ma zanenê ke bi hezaran qehramanê ma estê ke hîna tarîxzanê ma ser pê nêkerdê. Ma qey eş û dej ancenê, çimkî yew nîyê.”
Tewro muhîm qezencê şarê ma yo
Uren wina domna: “Ganî heme partî û sazîyê kurdan bivajê êdî bes o û ma tifaqa xo awan bikê. Ewta de her kes bi rehetî fikrê xo anenê ziwan, dem demê ez ezîtî nîyo. Eyro tewro muhîm qezencê şarê ma yo, ma heme endamê Kurdistanêkî yê la belê ziwanê ma de sey ziwanê îşxalkaran vanê kurdê Îran, kurdê Surîye û kurdê tirkan ma zey aîdî şarê bîn ameyî nîşandayiş. Ma vanê kurdan serkewte yê no ser zî şerto ke bi lezî tifaqa xo awan bikê.”
Sekreterê Komela Şêx Seîdî Felat Ozsoy zî aşkera kerd ke demêko derg o Kurdistanê Vakûrî de seba yewîyeyî û tifaqe xebatê yenî kerdiş, na komxebate goreyê seba ey pawiyayişê qezencê kurdan modelêk gêrayiş o û wina domna: “Na komxebate de sewbî fikiran şîrovekerdiş zaf bi muhîm o. Tewro peynî 2 weçînayişê de kurdî seba yewbînan xortkerdişî pîya ameyê têhet. Modelêk bêro weçînayiş ganî verdewamîya ci û pratîk de do bêro şuxilnayiş.”
Rojhelatê Mîyanên newe ra dizayn beno
Ozsoy bal ont muhîmîya seba şaran yewîyeyî ser û wina dewam kerd: “Goreyê heme şaran tifaq yew lazimeyêk a, seba kurdan tifaq tena berpirsîyarêka sîyasî nê, şertîyêka tarîxî ya. Rojhelat Mîyanên de şerê Dinya yê 3’inî yena cuyayiş û no ser zî newe ra yena dîzaynkerdiş eke kurdan tifaqa xo temam bikê do seba şarê xo netîce bigê. Tena tifaq weçînayiş de nê komelkî yew tifaq şert a, ma zî zey komela xo fikir û pêşnîyazê xo pêşkêş kerd û seba serkewtişê tifaqe zî destê ma ra çi bêro do ma bikê.”
Rolê xo eşkenê dinya de kay bikê
Xebatkara DÎKî Dîlan Aydin aşkera kerd ke na komxebate bi rayberîya sazî û partîyê kurdan yena viraştiş armanc awankerdişê tifaqa Kurdistanî yo û wina domna: “Seba ke verê kongre bêro awankerdiş na komxebate yena viraştiş. Na komxebate de şerto ke nameyê ci bêro ronayiş û awanîyêk bêro sazkerdiş. Ma nêeşkenî bivajê yew komxebate de serkewtiş yena. Rewşa kurdan nika astêka krîtîk de ya, Kurdistanê Vakûrî de nika teda û zilmê hem şar hem sazîyê, partî zaf ê. Vera nê hêrişan zî çare tifaqa kurdan a, do tifaqe nêbo her tim parçe parçe rewşêk bibo. Tifaqêk eke bibo do cewab heme hêrişê dewleta tirkî ra bêro dayiş. Zey nan û awe lazimeya kurdan tifaqe esta. Kurdan nika Rojawan de serkewte yê û rolê xo eşkenê Rojhelat Mîyanên û dinya de kay bikê.”