Kurdê ke Ewropa de cuyenî vera hêrişê PDKyî yê Şengalî ser de şermizar bikerî, meşîyayîşêk daybî destpêkerdiş û meşîyayîş roja xo ya 6. de domîyeno. Babete ser o Mehmet Surmelî, Suleyman Rengîn, Bedran Karaman, Hemserekê NAV-YEKî Zerdeşt Gunay, Heval Kurdistan û Oktay Akaslanî qisey kerdî. Mehmet Surmelî: Ma Dusseldorf ra dest bi meşîyayîşî kerdbî û meşê ma dewam keno. Hêrişê PDKyî nînî qebul kerdiş. Ma wazenî ke vera hêrişan de raya pêroyî zana bikerî. Ma heta nika problemêk nêcuyayî. Çalakîya ma do 27ê adare de Bruksel de biqedîya. Ganî Şengal bibo wayîrê statuyêk Suleyman Rengîn: Ma ser nameyê dezgehê kulturê êzidîyan 4 kesan dest bi meşîyayîşî kerd û ma wazenî ke heta peynî bimeşyî. Ma hêrişê çeteyanê PDKyî şermizar kenî. Ganî Şengal bibo wayîrê statuyêk. Ma wazenî Şengal de bi projeya Rayber Apoyî xo rêxistine bikerî.” Bedran Kahraman: Ez Swîsre ra beşdarê çalakî bîya û endamê îdareyê Dîasporaya Şengalî ya. Ma seba ke Şengal bibo wayîrê statuyêk, meşîyenî. Ma nêwazenî ke çeteyê Pêşmergeyê Rojava û AKP-PDKyî Şengal de bica bibî. Ma seba ke çeteyî Şengal ra bivejyî meşîyenî. Zerdeş Gunay: PDK destûr nêdano ke êzidîyî xo rêxistine û îdare bikerî. Ma wazenî êzidîyî bişînbî xo rêxistine bikerî û îdareyê xo bi xo bikerî. Cayê ke ma mîyan ra derbaz benî de ma reaksîyonanê pozîtîf gênî. Ez veng dana şarê ma, wa beşdarê mîtînga ke 27ê adare de Bruksel de bêra viraştiş, bibî. Wa azad bicuyî Heval Kurdistan: Ez Celle ra beşdarê meşîyayîşî bîya û seba ke hêrişê ke Şengalî ser de benî şermizar bikera, beşdar bîya. Ez wazena ke wa merdimî Şengal de bi hawayo azad bicuyî. Oktay Akaslan: Ez sey kurdêko musluman beşdarê meşîyayîşî bîya û ez piştî dana şarê ma yê Şengal û Rojawanî. Ez seba ke mîyanê kurdan de yewîye bêra awankerdiş, tîya de ya. Dişmenê ma qet nêbeno dost. Ganî ma fek îxanetî ra veradî û biagêrî raştîya xo.
ANF/BRUKSEL