Çalakîyê grevê vêşanîye ke seba wedaritişê tecrîdî amebî destpêkerdene, dewam kenî. Çalakgerê ke xeylê cayan de xoverdayîşê xo domnenî, dîyar kerdî ke êdî wextê qiseykerdişî nêmendo, wext wextê çalakîyan û eştişê gaman o. Çalakwanan ra Ardil Çeşme va ‘ma wezîfeyê xo kerd, nika dora şima ya’.
Seba wedaritişê tecrîdkerdişê Rayberê Şarê Kurdî Abdullah Ocalanî, çalakîyê ke dîyaybî destpêkerdene, dewam kenî. Leyla Guvene 178 rojî, Nasir Yagiz 165 rojî, xoverdayoxê Strasbourgî û Îmam Şîş 139 rojî, girewteyê hepisxaneyanê Tirkîya û Kurdistanî de zî 140 rojî yo grevê vêşanî de yê.
Xoverdayoxanê grevê vêşanîye ra yew zî Huseyîn Yildizo ke 104 rojî yo ke bajarê Den Haagî de xover dano yo. Yildizî, dayîkê ke seba domananê xo yê ke hepisxaneyan de yê çalakîyan kene, silam kerdî û derheqê grevê vêşanîye de hîsanê xo ardî ziwan.
Yildizo ke Dêrsim de ameyo dinya, va ‘Alî Haydar Kaytan û ez ma merdimê yewbînî yê’ û wina domna: “Dimayo ke Alî Haydar Kaytan Anqara ra ame Dêrsim, mi zî têkoşînê azadîye yê Kurdan nas kerd. Dima ra zî mi heta ewro cayê xo mîyanê têkoşînê azadîye de girewt. Lîse û unîverseîte de tewrê xebatanê Tevgerê Ciwanan bîya û ez zaf reyan ameya tewqîfkerdene. Serra 1988î de kewta zîndan. Serra 1990 de reya bîne agêra wezîfeyê xo yê mamostayîye ser û mi heta serra 1995î dewam kerd. Dima ra zî raywanîya Ewropa dest pêkerde.”
Ez kêfweş a ke beşdar bîya
Yildizî va ‘destpêkerdişê Leyla Guvene ra dima, mi zî waşt ke ez nê prosesê tarîxî rê biba cewab’ û wina dewam kerd: “Dima ra ez na babete ser o fikirîya, mi qerar da ke tewrê çalakîye biba. Ez keyfweş a ke beşdarê nê xoverdayîşî bîya. Sere de Leyla Guvene û Nasir Yagiz, ez heme hevalê ke zîndanan û teber de xo ver danê û dayîkanê xoverdayoxan silam kena.”
Tarîxê ma tarîxê xoverdayîşî yo
Çalakwanê ke 30ê Nîsane de dest bi rojeyê mergî kerd ra yewe zî Ardil Çeşme ya. Ardil Çeşme bi rayîrê telefonî Zîndanê Gebze ra qisey kerde. Çeşme rojeyê mergî sey dewamê xoverdayîşê 14ê Temmuze şinase kerd û wina va: “Eke Tirkîya çareserkerdişê meseleya Kurdan de samîmî ya, ganî her çî ra verê tecrîdê serê Rayberê Şarê Kurdî Abdullah Ocalanî wedarno. Zîndanan de bi hezaran tepişteyî semedê wedartişê tecrîdî grevê vêşanîye de yê û heta ke waştişê ma bêro ca çalakîya ma do dewam bikero. Ganî şarê ma her cayî biaçarnê cayê çalakîyan. Rîyê bêvengîya AKP û şarî ra ma dest bi rojeyê mergî kerd. Se beno wa bibo, ma do tecrîd bişiknê. Bê serkewtiş yewna rayîrê ma çin o. Nika waxtê çalakîyan o. Semedê sîyaset û rayapêroyî na hemleya ma ya peyêne ya. Ewro ra tepîya çîyo ke destê ma ra bêro çin o. Nika dora şima ya. Xoverdayîşê Xeyrî, Mazlûm û Kemalan ewro dewam keno. Şarê ma ganî vera zulmê îqtîdarê faşîstî de milê xo çewt mekero. Tarîxê ma de bêvengîye çin a. Tarîxê ma tarîxê xoverdayîşî yo. PKK felsefeya cuye yo. Ma do bi ruhê felsefeya cuye ser bikewê.”
AMED