Kesê ke do referandûm de vajî nê, her ke şono zêde benî û her roje hetê cîya-cîyayî seba çi do vajî nê, aşkere kenî. Heta nika akademîsyenan ra heta sîyasetmedaran, hunermendan ra heta mamostayan, esnafan ra heta karkeran xeylê kesan fikrê xo aşkere kerdî.Na rey zî babete ser o amedijan qisey kerdî.
Yê bi wijdanî yê nêşenê vajê ya
Aydin Ayvaciyî va ‘ez do merg û rijîyayîşê ke Sûr, Nisêbîn, Cizîr û Şirnex de ameyî cuyayîş ver vaja nê’ û wina domna: “AKPyîyan seba ke Ewropa de destûr nêdîya konferansê înan hende qiyamet weriznayî, çi rew parlamenterê ke destûr nêdaybî ke bikewî Sûr, Cizîr, Nisêbîn û Sûr xo vîra kerdî. Sûr, Cizîr û Şirnexî heme rijnayî. Bi seyan merdiman qetil kerdî û destûr nêdayî ke domanî bêrî definkerdiş. Ma domanê ke dolaba cemedî de ameybî nimitiş, xo vîra nêkenî. Ê ke ewja de bî, ma însan nêbî? Yê ke wijdanê ci bibo, nêşêno vajo ya. Ez veng dana heme kurdan wa vajî nê.”
Kurdan çinî hesibneno
Emrullah Zumrutî zî va ‘heme îmkanê dewlete seba ke ‘ya’ bivejîyo seferber kenî’ û dewam kerd: “Ewro berpirsîyarê rewşa ke esnaf û pêroyî welat tede yî, îqtîdar o. Ê çiqas ‘ya’ de israr bikerî wa bikerî, ma do vajî nê. Çimkî seba vatişê nê bi desan sebebê ma estî. No welat de kurdî çinî yenî hesibnayîş.”
Ganî tirkî zî vajî nê
Rojhat Bîlmezî zî dîyar kerd ke wazîyeno Tirkîya de rejîmêko yew kesî bêro awankerdiş û wina va: “Bi Sîstemê Serekî do hêzê qanûn viraştiş, caardiş û dadgeh kesêk de kom bibî. Cok ra ez do vaja nê. Eke ‘ya’ bivejîyo kurdan ra zafêr do tirkî vînî bikerî.”
Sedat Odumluyî zî va ‘seba ameyoxêka azade ma do vajî nê’ û wina qedêna: “Seba ke rejîmê yew kesî û dîktatorî hakim nêbo, zext û tedayî zêde nêbî û seba ameyoxêka azade ma do vajî nê. Eke referandûm de ya bivejîyo o wext do welat de dîktatorîyê sey welatanê Afrîka bivejîyo.”
Mehmet Akalanî zî va, ‘Heta nika ma ti feydeyê hukmatî nêdî’, cok ra dê vajî nê.”
MELEK YUKSEL / ANF / AMED