Qezaya Kerboranî ya Mêrdînî de wextê xoverdayîşê xoserîye ra nata 2 reyî qedexeyê tebervejîyayîşî ame îlankerdiş. Netîceyê pêrodayîşan de bi desan sîvîlî ameybî qetilkerdiş û bi seyan ciwanî zî ameybî tewqîfkerdiş. Labelê dewlete nêşînaye xoverdayîşê şarî bişikno.
Dima ra qayûm tayînê qeza bî û qeza de hûmara qoricî û bekçîyan zêde bîye. Nika zî seba derbazbîyayîşê tanqan rayîrî yenî viraştiş. Merdim hema nêreseno merkezê qeza, abluqa hîs keno. Kewtiş û vejîyayîşê qeza de nuqtayê kontrolî estî. Her roje bi desan ciwanî bi îdîaya ‘xendekan de mendo’ ra yenî tewqîfkerdiş û ceza dîyena înan. Şar nêşêno meymandarî daxî bikero. Çimkî polîs û leşkeri meymanan kontrolan ra derbaz kenî.
Ciwanan ser o çîyanê pîsan ferz kenî
Dewlete polîtîkayê ke Sûr, Cizîr û Nisêbîn de bica ana, Kerboran de zî bikar ana. Hewl dana bi tiryak, fuhuş û tacîzî ciwanan rayîr ra veja. Reyna hûmara qoricî û bekçîyan her roje hîna zêde bena. Welatîyî dîyar kenî ke ê nêşênî cîrananê xo reyde qisey bikerî, çimkî çîyo tewr şenik de erzenî keyeyan ser de û wina vanî: “Ma nêşênî nefes daxî bigîrî. Seba ke tîya bigîrî binê kontrolê xo, çi destê înan ra bêro kenî.”
Cinîyî kewtişê qeza de raştê tacîzî yenî û mamostayê cinîyî zî hetê polîsan ra raştê tacîzan yenî. Mamostayî nêwazenî babete ser o qisey bikerî.”
JINNEWS/MÊRDÎN