No 18 serrî yo ke Rayberê Şarê Kurdî Abdullah Ocalanî ser de tecrîdêkî esto û no tecrîd bitaybetî 27ê Temmuza 2011î ra nata bi hawayêko giran domîyeno. Çimkî 27ê Temmuza 2011î ra nata avûkatê Ocalanî bi ti hawayî nêşenî muwekkîlê xo reyde pêvînayîşan bikerî. Reyna 5ê Nîsana 2015î ra nata zî Heyetê Îmrali nêşeno Ocalanî bivîno. Tewr peynî seba ke sîyasetmedaranê kurdan grevê vêşanî daybî destpêkerdiş, birayê Ocalanî Mehmet Ocalan 11ê Êlula 2016î de şîbî hetê Ocalanî û pêvînayîşêko kilm kerdbî.
O tarîx ra nata heme muracatê keye, avûkat û Heyetê Îmraliyî bi mehneyanê 'rewşa hewa baş nîya', 'keştî xirabe ya', 'keştî tamîr de ya' û 'OHAL' yenî redkerdiş. Tewr peynî bira û waya Ocalanî Mehmet û Fatma Ocalane seba ke Roşanê Qurbanan de pêvînayîş bikerî, muracatê Serdozgerîya Komare ya Bursa kerdbî. Muracatê înan zî bi mehneya 'Astengîyê ke seba hepsîyan ameyî vetiş' ame redkerdiş.
Babete ser o Mehmet Ocalanî qisey kerd û vera nêyî de reaksîyon nîşan da. Mehmet Ocalanî dîyar kerd ke demanê peyênan de muracatê înan bi mehneya OHALî yenî redkerdiş û da zanayîş ke ê nêzanî do no proses heta key dewam bikero. Ocalanî va 'seba ke heqê ma yê demokratîkî nêrî astengkerdiş, ganî vernîya pêvînayîşan bêro akerdiş'.
Grawa Îmrali de se beno?
Mehmet Ocalanî dewamê qiseykerdişê xo de va 'hetê huqûqî de avûkat û keyeyê hepsîyêkî eşkenî o/aye hepsîy/e reyde pêvînayîş bikerî û no heqêko esasî yo' û wina dewam kerd: "Heta nika roşanî zî tede heme muracatê ma bi hawayo bêhuqûqî ameyî redkerdiş. 11ê Êlule ra nata ma ti xebere birayê xo ra nêgênî. Ma nêzanî Îmrali de se beno û cok ra ma zaf etirîyenî. Ma dewlete ra vanî, sey keyeyêkî heqê ma yo demokratîk esto. Seba ke ma bişînbî nê heqê xo bixebetnî, ganî şima demêko rewêr rayîrê Îmrali biakerî. No çîyêko antîdemokratîk o. Dewlete û hukmat çira nêverdanî ke ma pêvînayîş bikerî? Ganî no derheq de îzehetêk bêro dayîş."
Seba aştîya Rojhelato Mîyanênî muhîm o
Ocalanî peynîya qiseykerdişê xo de bale ant muhîmîya pêvînayîşan ser û wina va: "Roşanê Qurbanan seba Tirkîya û Rojhelato Mîyanên zaf muhîm o. Nê erdan de her roje gonî rijîyena û yê ke bişînbo rijîyayîşê na gonîye bido vindarnayîş Rayber Apo yo. Cok ra Rayber Apo tena seba Tirkîya nê seba aştîya Rojhelato Mîyanênî zî muhîm o."
ANF/RIHA