Ma qasê dîyalogî pawitiş rê zî amade yî 

Endamê Heyetê Caardişî yê TEV-DEMî Aldar Xelîlî derheqê hêriş û dagîrkerîya dewleta Tirkî de qisey kerd û mesajê muhîmî dayî. Xelîlî da zanayene ke Erdogan bi serran o ke hêrişê têkoşîn û sîstemê demokratîke yê Kurdan keno.

Xelîlî va ‘Erdoganî vernîya çimanê dinya de hêrişê Efrînî kerd’ û wina domna: “Verê cû zî Bab, Ezaz û Cerablusî dagîr kerdbi. Tena rojhelatê Firatî nê, wazeno Başûrê Kurdîstanî zî dagîr bikero. Gelo raya pêroyî ya dînya hende kor û lal bîyo ke tehdîdanê Erdoganî temaşe kenî?”

Xelîlî va ‘sîstemê ma yê Îdareyê Xoserî seba ti kesî tehluke nîyo’ û wina dewam kerd: “Ma projeyanê xo mîyanê sînoranê Sûrîye de erzenî dewre û amancê ma şer nîyo. Ma qet nêvato ma do Sûrîye parçe bikerî û dewletêk awan bikerî. Ganî welatê cîranî zî nê sîstemî ra memnun bibî.”

Seba ke Îdareyo Xoser wedarno, şert eşt werte

Xelîlî bale ant şertê Tirkîya yê seba herêma biewle ser û wina va: “Tirkîya seba herêma biewle şertê 32 km erzena werte. Eke herêmêka hende bêro awankerdenee, o wext ti manaya Îdareyê Vakur û Rojhelatê Sûrîye nêmanena ke herêma biewle bêro awankerdene. Xora herême heme hende hîra ya. Tirkîya seba ke Îdareyo Xoser werte ra wedarno, şertêk winasî eşt. Ma zî dîyar kerd ke ancax 5 km beno. Tirkîya hewl dana ke bi tehdîdan waştişanê xo bido qebulkerdene.”

Ma her dîyan rê zî amade yî

Xelîlî va ‘goreyê xeberanê çimeyanê herême, MÎT herême de plananê suîqestî virazeno’ û wina qedêna: “Xora heta nika xeylê kesî bi suîqestan ame şehîdkerdene. Seba ke moralê şarî xirab bikerî, çîyanê winasîyan xelq kenî. Ma binê tehdîdan de yî û dişmen resayo sînorê ma het. Ma qaso ke çareserî û dîyalog rê amade yî, pawitişê şarê xo rê zî amade yî.”