Serekkomar Erdogan çend rojî verê derheqê krîzê ekonomî û zêdebîyayîşê dovîzî de vatbi “Payan ser o girewtişê nê milletî, tena wezîfeyê ma nîyo. Wezîfeyê sanayî û tucarî yo zî. Eke wina bo, bizanê ke ez do plananê B û Cyî bierza dewre. Ma eynî keştîye de yî.”
Vera nê qiseykerdişê Erdoganî ke sey tehdîdî kerdbî de her ke şono reaksîyonî zêde benî. Parlamenterê HDPyî yê Stenbolî Musa Pîrogluyî û Sereka Pêroyî ya Partîya Tevgerê Kedkaran (EHP) qisey kerdî. Pîrogluyî va ‘polîtîkayanê şerî ver deynê dewlete zaf zêde bîyo’ û wina domna: “2 sebebê nêyî estî; sebebo yewin polîtîkayê neo-lîberalî yî. Sebebo dîyine zî polîtîkaya şerî û rijnayîş o.”
Pîrogluyî dewamê qiseykerdişê xo de wina va: “Ma baş zanî ke çi karker û patron û çi zî hakim û bindestî eynî keştîye de nêbî. 16 serrî wexto ke karkerî merdêne, domanê feqîran şer de merdêne, zengînî kêfê xo ra ewnîyayêne. Heta nika qet qederê ma nêbi yew û do nêbo yew. Nê vatişê îqtîdarî seba xapênayîşî yo. Ma zî vanî tîya de bedelo ke şar bido, çin o. Orte de şerêkê sinife esto. Ma ancax bi hêzê xo yê rêxistinbîyaye eşkenî serbikewî.”
Ganî şar û kedkarî qirika Erdoganî bitepişî
Uzune zî va ‘bêkarîye, enflasyon û kewtişê erjê pereyî welat bi rijîyayîşî şono’ û wina dewam kerde: “Bi no hawa sanayî û xelqkerdişî nêbeno. Cok ra kesêkê serê nê prosesî de yo û kedkarî eynî keştîye de nîyî. Ganî şar û kedkarî qirika Erdoganî bitepişî. Ewro seba ke welat krîz ra bixelisîyo, lazimîye bi têkoşînê polîtîkî yê kedkaran esta. Ma do sey partîye, bi heme hêzê xo têkoşînê xo gird bikerî.”
MA / STENBOL