Bade 15 Temmuzê rewşe sîyaseta Tirkîya û ciwîyayişe şarê ma zaf bi xirabin. Serekkomarê Erdogan derbeyê 15 Temmuzê de qurnazî kerd û xo eşt vernî, çike Erdogan waştene ke mîyanê Tirkîye da kam ver ba ey de yo bîyarî binê deste xo yan zî vengane muxalîfan bibirno. Bi raştî wîna zî bi. Bade derbe îlane OHAL î kerd û dîkdatorîyê xo eşkera kerd.
Dikdatortî çekuya latinkî yo. Tarixe dîkdatortî 2. seserre de destepekerd o. Dîkdatortî ferhengan de wina yeno manakerdiş: Yew welatî de bê şert û bê qeyde îdare kerdiş tena bi yew merdim serde yo. Heme dîkdatoran mîyane komelan de merdiman û şaran ser de zûlm û zorî kerdî. Labelê yew dîkdator zî heta peynîye emrê xo bi dîkdatorî nê rameyî.
Tarixe dîkdatortîyê Tirkîya sazgehê xo ra destpekerd û heta ewro zî bi Erdogan dewam keno. Goreya kurdan zî heme serekkomaran Tirkîya seba kurdan dîkdator bî. Dîkdatorê peyen a Tirkîya Erdogan o. Pratiq de Erdogan xora yew dîkdatorê. Labelê ey qayilo ke no rewşe xo hem bi qanunan dewam bikero hem zî caye xo ye dikdatorî zixm bikero. Semedo ke ne zî meclîsê Tirkîya de bê huquqî û bi zorî newe yew qanûnê bingeyî viraştî. Qanûnê bingeyê newe bi reyanê AKP û MHP meclîs ra viyert û nika zî no qanûnê bingeyî şawenî referandum. Eger ke referandum de şaranê Tirkîya vaje se "e" qanûnê bingeyî bedilîyeno û Erdogan zi bi reyanê şaran beno dîkdatorê Tirkîya. Nika rewş wîna aseno. Cûnke ser merdiman de yew tersa xeylek pîl esto. Kam ke verba Erdogan bibo se înan kerdî xepisxane. Kam ke zî teber de yo wexto ke venganê xo kerd berz înan ra zî yan îşkence kenî yan zî erzenî xepisxane. Yanî yew trajedîya gird mîyane Tirkîya de rameno. Wîna aseno ke nika vayî het Erdogan de yo, cunke her çî destê ey de yo. Ma zanane ke semedo viyarnayişê no referandum AKPyîjan heme raharan ceribnenî.
Qederê Tirkîya no referandum de eşkera beno. Goreya fikrê mi peynîye referandum de yan hetê "e" ra, yan zî hetê "nê" ra bivejîyo se seba ma kurdan ferq nêkeno. Erdogan wirdî hetî ra zî dîkdatortîyê xo û zulme xo dewam keno. cunkê sistemê Tirkîya her wext de kurdan ra dişmen o. Her di rewşe de zi no dişmenî nêvindeno.
Omidê xelasîya kurdan gereka ser o Tirkîya de nêbo. Xelasîya kurdan tena bi tekoşînê xo û xoserîye herre xo de beno !!!