Dayîka çalakwananê grevê vêşanîye Murat Şîmşek û Sûat Şîmşekî Bedîa Şîmşeke va ‘ma pêvînayîş û mesajê Ocalanî bi kêfweşî taqîb kerd’ û wina domnaye: “Saya doman û dayîkan de no netîce vejîya orte. Ma soz dabi 8 cananê xo ke qezenç bikerî. Ma sozê xo bica ard.”
Çalakwananê grevê vêşanîye û rojeyê mergî peynîya xoverdayîşêko tarîxî de resaye amancê xo. Çalakwanan ra Îhsan Bûlût Zîndanê Wanî de 136 rojî grevê vêşanîye de mend û 28 rojî zî çalakîya xo sey rojeyê mergî domnaye. Bûlûtî mabênkarîya avûkatê xo mesajêk erşawit.
Bûlûtî mesajê xo de vato ‘Ma her kesê ke seba wedarnayîşê tecrîdî têkoşîn dayo rê silamanê xo erşawenî’ û wina domna: “No xoverdayîş rolo esasî yê dayîkan o. Ma lew nanî destanê înan ro. Xoverdayîş û qerardarîya dayîkan bi sebeb ke ma qezenç bikerî.”
Pîyê Bûlûtî Ahmet Bûlûtî zî wina va: “Senî ke îzehet ame dayene, ez û cinîya xo ma ameyî Wan. Rî bi rî nêbo zî ma avûkatan ra xebere girewte. Îdareyê zîndanî dîyar kerdo ke ê do cêrzemînê nêweşxane de tedawîya înan bikero, labelê domananê ma qebul nêkerdo. Cok ra înan domananê ma tepîya berdî zîndan. Labelê badê ke ÎHD û Odeyê Tabîban mudaxale kerdo, înan odeyanê normalan de dest bi tedawîya hepsîyan kerdo. Nika rewşa domanê mi baş o. No xoverdayîş de para dayîkan pîl a. Ez bawer kena ke do dewamê ci zî bêro. No proses de ganî seba ke tecrîd dibare nêdomîyo, herkes wa taqîb bikero.”
Ma soz dabi 8 cananê xo
Dayîka Murat û Suat Şîmşekî ke her di zî grevê vêşanîye de mendî, Bedîa Şîmşeke va ‘ma zaf rojê zehmetinî derbaz kerdî’ û wina domnaye: “Ma pêvînayîşê avûkatan û mesajê Rayberê Şarê Kurdî Abdullah Ocalanî bi kêfweşî taqîb kerd. No netîceyê qerardarîya domananê ma û têkoşînê dayîkan de vejîya orte. Ma dayîkî hertim hetê domananê xo de yî. Tena na çalakîye de nê, hertim wina yo. Înan va qey ma do fek tira veradî, labelê ma veranêda û ma do veranêdî zî. No têkoşîn şehîdan ra ma rê mîras mendo. Ma soz dabi 8 cananê xo ke ma do qezenç bikerî. Ma sozê xo bica ard.”
Ma bi îradeyêkê xurtî giredaye yê
Xoverdayoxanê rojeyê mergî ra Sena Efe ya ke Zîndanê Patnosî de ya bi telefonî keyeyê xo rê qalê zextê ke xoverdayoxî dimayê çalakîye ancenê, kerd. Efe dîyar kerd ke rixmo ke nê newe çalakîya rojeyê megî ra vejîyayî, wero hest dîyeno înan û wina va: “Doktoran do serûm bidayêne ma. Ma bi saetan odeyêk de dayê vindarnayene. Fermandarê leşkerî yê zîndanî tedawîya ma asteng kerde û ma peyser ardî zîndan. Îdareyê zîndanî sey dişmenî nêzdîyê ma beno. Wazenê ke ma çalakîye ra dima seqet bimanê. Bitaybetî zî mudirê 1. Amet Ergun naye wazeno. Eke teber ra heyetêk mêro tîya, zextê serê ma nêqedîyenê û beno ke hîna çîyêkê xirabî bêrê ma ser.”
Sena Efe bale ante xoverdayîşê dayîkanê laçiksipîyan ser û qiseykerdişê xo wina qedêna: “Ma dayîkanê xoverdayoxan bi heskerdiş û rêzdarî silam kenê û destê înan heminan bi hurmet maç kenê. Tecrîd ame wedarnayene labelê nêqedîya. Ma bi îradeyêkê xurtî Rayberîya xo rê giredaye yê û xoverdayîşê ma do heta peynî dewam bikero.”
AMED