Bahoz Erdal: “Ma şopdarê Mazlum Dogan, Kemal Pîr, Egîd û Zîlane yî. Ma bi nê hîs û coşî serrgêra 40. ya partîya xo pîroz kenî. Ma zanî ke barê ma giran o û hêrişê girdî estî. Labelê ma do serbikewî.”
Serrgêra 40. ya ronîyayîşê PKKyî bi merasîmêkê leşkerî koyanê Kurdîstanî de ameye pîrozkerdene. Fermandaranê Qerargehê Merkezî yê Pawitişê Şarî Bahoz Erdal û Gulistan Gulhate, fermandaranê HPG û YJA Starî ra Jindar Zagrose, Rêzan Amede û Ferzad Wan beşdarê pîrozkerdişî bîyî.
Merasîm de Bahoz Erdalî qisey kerd û dîyar kerd ke no tevger qet bin nêkeweno û do bi tesilî qezenç bikero. Fermandar Erdalî va ‘ma serrgêra 40. ya PKKyî sere de Rayber Apoyî rê, şarê Kurdîstanî rê û heme embazan rê pîroz kenî’ û wina domna: “Mîyanê nê 40 serran de hêzo ke hêrişê partîya ma nêkerd, nêmend. Herçiqas ke hende hêrişî bîyî zî, partîya ma vera nê hêrişan de sey koyanê Cûdî û Muzirî xover da û payan ser o vindet.”
Erdalî dewamê qiseykerdişê xo de va ‘Kurdîstan de ti rêxistine vera hende komplo, kay û hêzan de payan ser o nêmenda’ û wina dewam kerd: “Partîya ma 40 serrî yo ke vera hêrişanê îmha de xover dana. Gelo kamcîn serkewtişo ke Kurdîstan de bîyo de rolê PKKyî çin o? Tena hetê leşkerî û sîyasî de nê, hetê fikrî û komelkî de zî rolê PKKyî esto. Eke kes xayîn nêbo, biewnîyo PKK ra ver û PKK ra dima çi bedilîyayîşî bîyî vîneno. Eke ewro kurdî herême û dinya de bîyî hêz, no saya PKKyî de yo.”
Têkoşînê PKKyî do azadî bîyaro
Erdalî qiseykerdişê xo de qala çîyê ke bêrî kerdene zî kerdî û wina va: “Ganî bêro zanayene ke nê dişmenî çiqas hêrişê kurdan û demokrasîya herême bikerî, ma zî do hende xoverdayîşê xo gird bikerî. Ê çiqas hêriş kenî wa bikerî, çiqas îşkence kenî wa bikerî, sernêkewenî. Xoverdayîşê PKKyî do şaranê Kurdîstan û Tirkîya rê azadîye bîyaro. Îsbatê nêyî tarîxê têkoşînî yê PKKyî yo. Eke şima tarîxê têkoşînî yê PKKyî ra biewnî, şima vînenî ke no tevger qet bin nêkeweno û do na doze qezenç bikero.”
Ganî îradeya kurdan rê rêz bigîrî
Erdalî hetê Amerîka ra hedefbîyayîşê 3 embazanê xo ser o zî wina va: “Demanê peynî de îdareyê Amerîka 3 embazê ma hedef nîşan dayî. Amerîka Rayber û îdareyê ma ra çi wazena? Ma dişmenê şarê Amerîka nîyî û yê Amerîka zî nîyî. Ne partîya ma, ne Rayberê ma û ne zî embazanê ma nêkewtî mal û milkî dima. Tena seba azadîya şarê xo fikirîyenî û têgêrenî. Ewro ne ziwan û kulturê kurdan û ne zî estena kurdan yeno qebulkerdene. Eke çîyêk bikerî, wa vera nê înkarî de bivinderî. Labelê eke ê bi xo masa ser o estena kurdan bikerî babeta bazarî, o wext PKK do nê bazarê lêminî bivejo raşte û qebul nêkero. Ganî hêzê mîyanneteweyî vera îradeya kurdan de rêz bigîrî. Bi hawayo azade cuyayene heqê kurdan o zî. Eke wazenî herême û Rojhelato Mîyanên de aştîye bibo hakim, ganî kurdan nas bikerî û îradeya kurdan rê rêz bigîrî.”
Ma do serbikewî
Erdalî peynîya qiseykerdişê xo de va ‘seba ke ma gerîlayê Kurdîstanî yî ma zaf bişans î’ û wina domna. “Ma şopdarê Mazlum Dogan, Kemal Pîr, Egîd û Zîlane yî. Ma bi nê hîs û coşî serrgêra 40. ya partîya xo pîroz kenî. Ma zanî ke barê ma giran o û hêrişê girdî estî. Labelê ma do serbikewî. Ma şehîdanê xo bi hezaran reyan silam kenî û bihurmet vîr anî. Ma soz danî şehîdan ke ma do xeyalanê înan pê bîyarî. Na çarçewa de ma serrgêra 40. ya partîya xo yewna rey pîroz kenî. Wa bicuyo Rayber Apo.”
ANF / BEHDÎNAN