Emegdarê Ajansa Xeberan ê Dicle Bîlal Guldem o ke bi behaneyê xeberê xoverdayişê xorayverîyan yê qezaya Mêrdîn Nisêbîn taqîp kerd û di meng û nîmî tepişte mend diyar kerd ke ê zey wendekar û Generalê Qijkek yê Apê Musa raştîyan ra tawîz nêdanê. Guldemî serragêra qetilkerdişê Apê Musa de da zonayen ke ê dê bibê taqîpkarê rojnamegerê zey Apê Musa, Cengîz Altûn û pêro şehîdê çapemenî ke rîwalê raştîyan amey qetilkerdiş.
‘Bi qelema Ey raştîyan weşînenime’
Guldemî vist vîrkî ke bi desan rojnamegerî bi sebebê viraştişê xeberanê cayanê xorayverîn hona zî girotxaneyan de yê. Bîlal Guldemî aşkere kerd ke ê teber de bê zî, zerre de bê zî qelema ke Apê Mûsayan ra dewr girotî ra fek nêverdanê û wina dewam kerd: “Ma zey gurekarê çapemeniya azad bi sebebo ke ma zey waştena AKP rojnamegertî nêkerd ma bî hedefê êrişan. Senî ke Apê Mûsayan raştîyan ardî ziwan amey qetilkerdiş ma zî bi sebebo ke raştîyan ardî ziwan amey girotiş.Na dem û demê serranê 1990î zey pê yê.”
Nûçegîyana Ajansa Xeberan ê Cenî (JINHA) Bêrîtan Canozer ke wexto ke Amed de teber taqîp kerd amê giroten zî hayr ant êriş û zorvajiyên verra Çapemenîya Azad ser. Canozer zî aşkere kerd ke “Generalê Werdî yê Apê Mûsa iyê dê seba ameyişê gelenega Çapemenîya Azad xover bidê. Canozer vist vîrî ke sucê rojnamegerê tepiştî nuşteyişê raştîyan o û va ‘Ma nêverdanê ke raştî bîrê tepiştiş.’
Raştîyan ra benime roşnî
Nûçegîyana DÎHA Meltem Oktay zî wextê êrişê dûştê Nisêbîn de xeber taqîp kerd de amê girotiş û 5 aşman zerre de mend. Oktay zî vist vîrî ke Apê Musa rîwalê resnayişê raştîyan ame qetilkerden û va “zey serranê ravêrdî ma her çî da ver çimanê xo, bedel çi bo wa bibo ganî raştî bîrê nuştiş.”
Oktay diyar kerd ke qelema Apê Mûsa destê înan de ya û va bi girotiş, tehdît û zorvajîyan nêşkenê nuştişê înan ra bibê manî. Oktay tewr peynî de aşkere kerd ke bedelê ci çi beno wa bibo ê pey heqîqetîyê û dê raştîyan ra bibê roşnî
DÎHA / AMED