Nobeta Edalet û Wijdanî yê HDP ke Wan de destpê kerd, roja hîrêyin de ramena. Nobedarî vizêr raştê zîyaretê temsîlkaranê sazîyanê civaka sivîl û esnafan amey.Verfekê HDP Osman Baydemîrî ke roja diyîne yê çalakî de qisey kerd hayr ant îşkenceyo ke dewijanê Şemzînanijan ra amey kerdiş ser û va, “Eke no bîyayîş Filîstîn de qewimyabîya do Erdoganî pêrokîn dinya bi vatişê ‘Birayanê ma yê misilman rê îşkence yeno kerdiş’ werznaba ser payan.
Nobeta Edalet û Wijdanî ke Parka Aştî ya Mûsa Anterî de ramena, vizêr bi zîyaretanê temsîlkaranê sazîyanê civaka sivîl û esnafanê sûk dest pêkerd. Rêxistinê HDP û DBP yê qezaya Rêya Armûş, TUHAD-DER, MEYA-DER, Komela Rojawa ke bi KHK amê girotiş û xeylê esnafî şî Parke û destegê xo day nûmayîşkaran. Zîyaretkaran bi nûmayîşkaran ra sohbet kerdî û ardî ziwan ke ê wekîlanê xo het de yî.
Tecrîd ser pêro şaran o
Verfekê HDP Osman Baydemîrî ke kombîyayîşê çapemenî de qisey kerd babedê ke rojdem de yê ser o qisey kerd. Baydemîrî hayr ant tecrîdê Rayverê Şarê Kurd ser û va: “Ti kes nêşkeno bi Ocalanî ra pêdîyayîş virazo. Tecrîdê ser Ocalanî, vilayê pêro Tirkîya û şaran bîyo.
Osman Bayademîrî vist vîrî ke HDP seba pêro şaran têkoşîn dana û wina dewam kerd: “Ma serbestîya şaranê bindest wazenê. La AKP 2015 ra na het welat açarnayo gola gonî. Hemî kerdişê ke Tirkîye de qewimyenê berhemê AKP û MHP yê. Nika pêro Tirkîya bin îzolasyon û tecrîdî de ya. Tirkîya açarnayê zîndanî. Eke ê tornê Îsmet bê, ma zî tornê Ehmedê Xanî yê.”
Îşkenceya Şemzînanî
Baydemîrî hayr ant îşkenceyê ke rojanê peynî de bîyê vêşî û qewimyayîşê Girotxaneyê Tîpa F ê Wanî ser û bi nê vatenan nêrazîbîyayîş damûsna: “Girotxaneyê Tîpa F ê Wanî de vera tepişteyanê cinî hêrîş û şîdeta bê bêexlaqî virazîyayê. Pawitox nêşkenê pêdîyayîş virazê û malbatî zanayîşî nêgênê. Aha no faşîzmêko aşkere yo. Ganî AKP ca de nê polîtîkayan ra fek verado. Îskender û Dehaqan nêşkîyay şaranê na hardî hesîr bighiro, nika ra tepya zî do nêeşkê bigîrê. Dewa Şapatan ê Şemzînanî de dewijan rê îşkence ameyo kerdiş. Pêro raya pêroyî vîna. Aha nê pêroyî hemkarîya AKP û MHP yê. Hemkarîya AKP û MHP, hemkarîya verg û luwe ya. Îşkenceyê dayîka 80 serrî kerdê. “Eke Îşkenceyê Şemzînan Filîstîn de qewimyabîya, do Erdoganî pêrokîn dinya bi vatişê ‘Birayanê ma yê misilman rê îşkence yeno kerdiş’ werznaba ser payan.”
Derdê AKP tenya şarê kurd o
‘Verfekê HDP Osman Baydemîrî ard ziwan ke AKP ser dişmenîya Kurdan sîyaset dana ramiten û qiseyanê xo wina qedêna: “AKP verdewamîya Sykes Picot wazena. DAIŞ’î yê ke Amed û Anqara de însanan qetil kerdî serbest yenê veradayen. Derdê AKP tenya şarê kurd o. Do na dişmenî sernêkewo. Sûkê ke Erdoganî welişnay Cizîr, Gever, Nisêbîn, Silopî û Şirnex dê newe ra bîrê ronayene. Ma dê pêro pîya serkewê.”
WAN