Wexto mesele  bibo Kurdistan rojdem lez bedilyeno. Şan de rojdem zobî yo serê sibê zobî yo.

Mi rojek verêcu waştenê ez têna ser weçînayîşê serokkomarî binusnê.
La rojdem zê laser bedilya.
Şerê Şengal û Rabîa vejîya.
Remayîşê pêşmergeyên PDK(KDP) vejîya werti.
Hina bikî qet û qet rûmetiya pêşmergeyên PDK mîyanê şarê Kurd de nêmend.
Ma vajî remayîş bes nîyo. Kemî maneno.
Hina aseno ke KDP bi planek Şengal û dorme Şengal teslîmê DAÎŞ’ê kerd.
La herhal KDP xoverdayîşê YPG û HPG hesab nîkerd.
YPG zê lasêr vejîya werti.
Xo resna Şengal û Rabîa. Koyê Şengal destê çeteyên DAÎŞ re vet.
Rabîa azad kerda. Vanî zaf silah zî destê çeteyên DAÎŞ re girewt o.
Fermandarê Merkezê Pawitişê Şarê(Navenda Parastina Gel) Murat Karayilan, Stêrk TV de qisey kerd.
Va, “Ma tîya re pê Şengal re nêvejîyenê û Şarê Şengal pewenê. Ma wazenê Kurd pêronê meselanê xo kiştek biverdenê. Hêzêk şîrik yê eskerî bivirazêne. Pîya Kurdistan bipawenê û hemberê çeteyên DAÎŞ’ê şer bikerenê”.  Yew rojdemê Kurdan yê bîn zî weçînayîşê serokkomiriy o. Tîya de seba weçînayîşê serokkomarî hîrê rojî mendî. Sellahaddîn Demîrtaş seba Kurdistanê Azad bîyo namzedê Şarê Kurd û şarê bîn. Şino ça mîtîng virazeno eleqeyek zaf gird seba eyê virazîyeno. Bi teybet mîtîngê Çewlîg û Dêrsîm de eleqeyek gird yê Kirdan(Zaza,Kirmanc,Dimil) seba Selahaddîn Demîrtaş virazîya.
Çewlîgij û Dêrsîmij vanî Demîrtaş zazayo. Ma reyanê xo danê Selahaddînê Zaza.