Qirkerdişê Cizîrî ser ra yew serre vîyart. O wext bi seyan kesî cêrzemînan de ameybî qetilkerdiş. Dewlete heta nika derheqê qirkerdişê cêrzemînê Cizîrî de ti game nêeşte û qatilî hetê dewlete ra yenê nimitiş. Kesê ke ameybî qetilkerdiş ra yewe zî Mahmut Duymak o. Keyeyê Mahmutî aşkera kerd ke do seba edalet, wijdan û heqî bivajî ‘nê’.Babete ser o cinîya Mahmutî Lutfîye Duymake qisey kerde. Duymake qala dejê xo kerde û va ‘her çiqas ke mergê Mahmut û xoverdayîşê Cizîrî ra serrêk vîyartbo zî dejê ma sey roja yewin o’ û qiseykerdişê xo rê wina dewam kerde: “Merdim nêeşkeno rojanê dejinan xo vîra bikero. Lajê mi hema zî nêzano ke pîyê ci merdo. Hende wext vîyarto la hema zî ma nêzanî Mahmut senî ameyo qetilkerdiş. Qet nêbo wa derheqê mergê Mahmutî de zanayîş bidî ma. Tena 5 kîlo este dayî ma û vatî; no mêrdeyê to Mahmut o. Mêrdeyê mi cêrzemîn de birîndar beno û dima ra yeno qetilkerdiş. Nizdîyê cêrzemînan de şer çin bî, eke ambulanse biameyêne do heme zî bi hawayo sax bixelisîyayênê.”
Cizîr de rojê weşî çin î
Duymake bale ante ciwanê ke cêrzemînan de ameybî qetilkediş ser û qiseykerdişê xo wina qedênaye: “Cêrzemînan de ciwanê sîvîlî yê 15 û 20 serreyî estbî. Qewimîyayîş de ma waşt ke xo biresnî cêrzemînan labelê ma nêeşkayî. Her çiqas ke dewlete ma qetil bikera zî ma doza xo ra fek veranêdanî. Seba ke hîna zaf gonî nêro rijnayîş, ma referandûm de vanî nê.”
OZGUR AYDIN/ANF/ŞIRNEX