15 çalakwananê rojeyê mergî ra Abdulhalik Kaplanî va ‘wexto ke dayîkî raştê hêrişan ameyî, gelo senî qîyamet nêqerfîya’ û wina domna: “Wa şarê ma hêzê xo ra bawer bikero û piştîya xo nêdo ti kesî. Ma ver bi xeyalanê xo şonî û ma bawer kenî ke şarê ma do têkoşînê xo gird bikero.”
Rayberê Şarê Kurdî Abdullah Ocalan 15ê Sibata 1999î ra nata Girawa Îmrali de bin tecrîdîko giran de yo û no tecrîd çend serranê peyênan de zaf bîyo giran. Wina bîyo ke çend serrî yo ke Ocalan ra ti xebere nîna girewtene.
Vera tecrîdî de çalakîyê grevê vêşanîye dewam kenî. Çalakîya Hemsereka KCD û Parlamenteran HDPyî Leyla Guvene roja 181. de, çalakîya Nasir Yagizî roja 168, çalakîya Îmam Şîş û 14 çalakwananê Strasbourgî roja 142, ya Fadîle Toke 108, çalakîya Yusuf Îbayî zî roja 116. de dewam kena.
Çalakîya grevê vêşanîye ke zîndananê Kurdîstan û Tirkîya de dewam kenî zî roja 143. de ya. Hepsîyan ra 15ê ci çalakîya xo açarnaya rojeyê mergî û rojeyê mergî zî roja 8. de dewam keno. Çalakwananê rojeyê mergî ra Abdulhali Kaplanî telefon de keyeyê xo reyde qisey kerd û mesajê xo da. Kaplanî heme hepsîyan silam kerd û wina va: “Ma zanî ke no xoverdayîş do tecrîdî wedarno. Ez heme embazanê xo ra bawer a. Ma zanî ke şima ma meraq kenî, labelê no tena bes nîyo. Ganî herkes têkoşîn bido û gêrayîşan bikero. Eke ma tena temaşe bikerî, o wext faşîzm xurt beno. Şertî çi benî wa bibî, o muhîm xoverdayîş o.”
Bêvengîye têkoşîn nîya, merg a
Kaplanî dewamê qiseykerdişê xo de wina va: “Kurdî dewlete ra çîyêk nêpawenî. Wa şarê ma hêzê xo ra bawer bikero û piştîya xo nêdo ti kesî. Wa ti kes dewlete ra çîyêk nêpawo. Hêzo tewr gird şar o. Ganî na bêvengîye biqedîya. No şar 40 serrî yo ke payan ser o yo. No proses de herkes serkêşê xo yo. Ma kurdan baş şinasnenî, kurdî vera heqareto ke dayîkan rê bi de bêveng nêmanenî. Ganî têkoşîn bêro dayene. Bêvengîye têkoşîn nîya, merg a.”
Kaplanî va ‘wexto ke dayîkî raştê hêrişî yenî, gelo senî qîyamet nêqerfîyeno’ û wina domna: “Ganî ciwanî nê bêehlaqî û heqaret qebul nêkerî. Wa şarê ma baş bizano ke faşîzmê AKP û MHPyî wazenî kurdan qir bikero. Bêhuqûqîya tewr girde zî Rayber Apoyî ser o yena kerdene. Ewro heqê pêvînayîşê keyeyî, telefon û mektûbe yenî astengkerdene. Ti cayê dinya de huqûqêko winasî çin o.”
Mergo zehmetin, mergo manewî yo
Kaplanî qala qerardarîya xo kerd û wina va: “Ma do çalakîya xo bi qerardarî bidomnî. Ma zanî ê se kenî û ma do se bikerî. Ma seba ke xo merg ra bixelisnî, veng nêdanî. Ma wazenî ke wa şarê ma xo mergî ra bixelisno. Çimkî mergo zehmetin merdişo fîzîkî nîyo, mergo manewî yo. Ez nêwazena derheqê weşîya ma de qisey bikera. Ma ver bi xeyalanê xo şonî û ma bawer kenî ke şarê ma do têkoşînê xo gird bikero.”
Heto bîn ra Parlamentera HDPyî Nuran Îmîre rojeyê mergî kirişt rojeva Meclîsî û seba ke cewab bido Wezîrê Karê Edaletî Abdulhamît Gulî ra çend persî pers kerdî. Îmîre Gulî ra persê ‘gelo eke zîndanan de mergî bibî, şima do îzehetêko senî bidî raya pêroyî?’ kerd. Îmîre persê xo de bale ant rojeyê mergî ke serra 2000î de dîyabi destpêkerdiş û netîceyê ci 28 kesî merdbî ser.
AMED