Çalakîya grevê vêşanî ya Nurîye Gulmene û Semîh Ozakçayî roja 232. de dewam kena. Seke yeno zanayîş Gulmene û Ozakça roja 76. de ameybî tepiştiş û çend rojî verê Ozakça tehlîye bî, labelê Gulmene hîna tewqîfkerde ya.
Semîh Ozakçayo ke roniştişo 3. yê doze de tehlîye bî, derheqê proseso ke cuya de qisey kerd. Ozakçayî dîyar kerd ke wexto ke vera OHAL û KHKyan de xoverdayîşî bîyî, hukmatî hewl da herkesî bêveng bikero û xoverdayîş ra zaf tersa.
Ozakçayî dewamê qiseykerdişê xo de wina va: “Ma heta nika xeylê neheqîyan reyde têrî mendî. Înan ma nêard mehkeme, avûkatanê ma tewqîf kerdî. Labelê dima ra bi hezaran avûkatî ma rê wayîr vejîyayî. Tîya de heme hewldayîşê AKPyî veng vejîyayî. Îtîrafkar Berk Ercano ke waşt îftîrayan bierzo ma ser, labelê ma bi pawitişê xo heme zurê ci vetî raste.”
Wa şarê ma piştî bido
Ozakçayî dewamê qiseykerdişê xo de qala dîyalogê xo û Gulmene zî kerd û wina va: “Ez hucreyo 5. de û Nurîye zî yê 3. de mendêne. Ma şînayêne veng bidî yewbînan. Ma silamî erşawitênê yewbînan rê. Vengê Nurîye zaf baş ameyêne û vengê aye de qet teredut çinêbî. Mabênê ma de ti ferq çinêbî, labelê nizdîbîyayîşê îqtîdarî ver ez ameya tehlîyekerdiş. Herinda ke şarê ma seba ma etirîyeno, wa têkoşîn bido û piştî bido ma. ”
Ozakçayî qiseykerdişê xo de qala cinîya xo Esra Ozakçaya ke grevê vêşanî de ya zî kerd û wina va: “Her rindîye bi kede bena. Heskerdiş zî bi kede beno. Tîya de fedakarî esta. Wexto ke merdim eşqê xo bifikirîyo, ganî şarê xo zî bifikirîyo. Çimkî yê ke eşq û heskerdişî zêde keno, nê yî.”
MA/ANQARA