Berpirsîyarê Komîteya Têkilîya Teberî ya TEV-DEMî Salih Muslîmî derheqê pêvînayîşê heyetê Vakurê Sûrîye û Rejîmî yê Şamî de va ‘ma nêzanî çi ame qisey kerdene, labelê tayê çîyî teknîkî qisey bîyî’ û wina domna: “Ma şorişêk viraşt û şorişo tewr raşt yê ma yo. Ma wazenî modelê xo yê demokratîke vilayê heme Sûrîye bikerî.” BERÎTAN SARYA ANF/QAMIŞLO Çend rojî verê heyetêkê Meclîsê Sûrîyeya Demokratîke (MSD) şibi paytextê Sûrîye Şam û ewja de selahîyetdaranê Sûrîye reyde pêvînayîşêk viraştbi. Heta nika derheqê muhtewaya pêvînayîşî de îzehetêk nêameyo dayene. Babete ser o Berpirsîyarê Komîteya Têkilîya Teberî ya TEV-DEMî Salih Muslîmî qisey kerd. Muslîmî va ‘heyet bi waştişê Şamî şi ewja û tayê pêvînayîşî kerdî’ û wina dewam kerd: “Ma nêzanî ewja de çi ame qisey kerdene, labelê tayê pêvînayîşê teknîkî ameyî kerdene. Sey nimune, Tebqa de seba şuxilnayîşê barajî pêvînayîşî bîyî û tayê muhendîsî şîybî ewja. Labelê no cîya amebi fam kerdene.” Muslîmî da zanayene ke na rey heyet bi hawayo fermî davet ame kerdene û wina va: “Heyetêkê Vakurê Sûrîye ra şi. Herkes vano qey heme çî bi pêvînayîşêkê çareser beno. Labelê pêvînayîş cîya yo, dîyalog û muzakere cîya yî. Merdim eşkeno vajo nêyî verpêvînayîşî yî. Yanî nê pêvînayîşî seba awankerdişê ewleyîye baş î. Eke çîyê bîyaye bibî, o wext merdim eşkeno gaman ver bi aver bierzo.” Ma nêvejîyayî teberê armancê xo Muslîmî wina domna. “Rejîm 2011 ra nata bi hawayo ‘Nêyî ma reyde yî, kurdî hetê ma de yî, baş î û sewbîna’ propogandayan keno. Labelê wina nîyo. Ma şorişêk viraşt û destpêk ra nata şorişo tewr raşt yê ma yo. Ma wazenî modelo ke ma awan kenî, vilayê heme Sûrîye bikerî. Muxalefetî tena şerê îqtîdarî da, labelê yê ma wina nîyo. Ma parçeyêkê Sûrîye yî û heta nika qet nêvejîyayî teberê Sûrîye. Ma wazenî nê modelî vilayê heme Sûrîye bikerî. Sûrîye êdî nêşêna biagêra rojanê verênan. Ê wextî derbaz bîyî û şîyî. Eke ma modelê xo awan nêkerdêne, ti kes ma goşdarî nêkerdêne. Nika modelê ma û hêzê ma yê pawitişî estî.” Ma nêwazenî Sûrîye parçe bibo Muslîmî qiseykerdişê xo de va ‘ma nêwazenî Sûrîye parçe bibo’ û wina dewam kerd: “Sere ra nata Sûrîye de kurd, ereb, tirkmen, çerkes, durzî, çeçen û sewbîna estî. Mîyanê Sûrîye de kamcîn kultur, bawerî, reng û nasnameyî estî, ganî heme bişînbî xo îfade bikerî. Modelê ma çîyêko winasî hedef gêno. Eke rejîm nêyî qebul bikero, o wext ma eşkenî nê modelî bierzî dewre. Ewro rejîm payan ser o yo û ma do nê rejîmî demokratîke bikerî. Bawerî û şarî do nasname û bawerîya xo bicuyî. Ma ancax eşkenî wina pêbikerî. Ti kes dîktatorî û koletîye qebul nêkeno. Ma wazenî ke wa rejîm rêz nîşanê îradeya şarî nîşan bido.” Rejîm ganî herkesî bifikirîyo Muslîmî peynîya qiseykerdişê xo de wina va: “Kam ke seba ameyeyê Sûrîye bifikirîyo û bixebetîyo, ma do hetkarîya ci bikerî. Rûsya wazena rejîmî payan ser o bitepişo û bipawo. Labelê eke Rûsya heme Sûrîye fikirîyena, ganî sewbîna hewa zî bifikirîyo. Ganî herkesî bifikirîyo. Eke wina bikero, ma do kêfweş bibî. Labelê eke waştişê partîya Baasî ma ser o ferz bikero, wina nêbeno. Ma bawer kenî ke do ti kes îradeya sîyasî teslîm nêgiro. Ma zî hewl danî bibî layîqê îradeya şarê xo.”