Malbatê Sûrî yê ke seba cenazeyanê domananê xo bigîrê kewtî greva veyşanîye, bi şew û roj nobed girotî, dîyar kerdî ke iyê dê wehşeta dewlet xo vîra nêkerê û referandûmî de vajê  ‘Nê’. 

Malbatê Sûrî ke dirbetê înan hona akerde yê, her Pancşem Mezelxaneyê Yenîkoyî de are benê û hesreta xo ciwîyenê. Malbatî anê ziwan ke iyê dê ti wext deja ke dewlet da înan iyê dê xo vîra nêkerê. 

Pîyê Mahsûm Polat (22) o ke Sûr de weşîya xo kerd vinî Yusuf Polat’î veng da her kesî û va, “Kesê ke wayîrê wijdanî yê ganî referandûmî de vajê ‘Nê’. Polat’î vist vîrî ke seba vatişê ‘Nê’ xêlê sebebî estê û wina va: “Iyê dê dîktatorîya yew merdimî rê vajê ‘Nê’. Ma mexdûrê wehşeta Sûrî yê. Mi lajê xo da.”

‘Helbet ma dê vajê ‘Nê’

Pîyê Turgay Gîrçek (16)î ke Sûrî de weşîya xo kerd vinî Murat Gîrçek’î zî  aşkere kerd ke rixmo ke ê hemwelatijê na dewletê zî domanê înan kiştî, keyeyê ma ma ser de rijnay. Gîrçek’î persa ‘ser hendayî dejan ma êşkenê vajê ‘Ya’ kerd? û va, ‘Helbet ma dê vajê ‘Nê’. 

Gîrçek’î aşkere kerd ke bedelê ci çi beno wa bibo o do vengê ‘Nê’ bido. Murat Gîrçek’î va, ‘Eke eke meşt vengê ‘Ya’ bivejyo, na dewlet do ma bikişo’ û wina dewam kerd: “Ti omidê ma na hikûmet ra nêmendo. Qey ma ehmaq vînenê? ke yenê vengan ma ra wazenê. Na seatî ra tepya ti vengo ke ma bidê înan çin o.”

‘O ke vajo ‘Ya’ do îxanet bikero’

Dakila Şervan Bakir’î Saadet Çam’î zî bi persa “Erdogan to seba ma çi kerd ke ti ma ra vengan wazenê? To ma kiştî, to ma sirgûn kerdî, to ma domananê ma ra dûr vistî” hêr û nêrazîbîyayîşê xo ard ziwan. Saadet Çam’î dewamîya qiseyanê xo de wina veng da Kurdistanijan: “Ez veng dana hêrokîn Kurdan. Yê ke şeref û namûsê înan esto, ganî her kes dîktatorî rê vajo nê nê nê. Kam ke vajo ‘Ya’ îxanet şarê xo ra keno. 

‘Wextê ters î nîyo’ 

Waya Xebat Erkaplan (25) ke Sûr de ame qetilkerdiş, Evîn Erkaplan zî bi vatenanê “Bes o, hinî no zilmî ser ma ra wedarnê” hêrsê xo damûsna. Erkaplan vist vîrî ke rixmo ke kezeba înan veşena zî, ê vanê “Haştî” û va, ‘Wa her kes çimanê xo akero û vajo “Nê”. 

Maya Ramazan Ogut (17) o ke şehîdê xoverdayîşê Sûrî yo Elîf Ogut zî wina behsê sebebê xo yê ‘Nê’ kerd: “Ma nêşkîya 5 aşmî cenazeya Ramazanî bigîrê. Tenya seba nayî bo zî ez a vaja ‘Nê’.” Ogut veng da şarê Kurd ke rîwalê Sûr’î vajê ‘Nê’. 


HULYA EMEÇ / ANF / AMED