Tirkîya de her ke şono krîzê ekonomîye pîl beno. Vayaya Dolar û Euro tesîrê xo ekonomîye ser de kena. Krîzê ekonomîye ver her çî vay bîyo û şar nêeşkeno ne çîk biwero, ne zî biherîno û zehmetî ancenê. Babet ser o welatîyî qisey kerdî.
Welatîyan ra Murat Çetîno ke seba kincan biherîno, şîbî sûke qisey kerd û wina va: “Ma seba pitika xo ya ke hema nêameya dinya, ameyî sûke. La hende ke çî vay î, ma nêeşkayî çîk biherînî. Tena ma tay sebze û kincê domanan girewt. Ma pêro pîya 270 TL girewtiş û rotiş kerd, o zî bi hawayo mecbûrî bî. Ma welatê ke senî de ciwîyenî?”
Bîlal Koskanato ke sûke de sebzeyan roşeno, aşkere kerd ke kîloyê goştî 50 TL yo û wina va: “Rewşa ekonomîye wina bîyo ke merdim nêeşkeno çîk biherîno. Sîyasetmedarî wa nêşerî Çankaya de qisey nêkerî, wa bêrî sûke de qisey bikerî. Wa sûke de derdê şarî goşdarî bikerî. Sîyasetmedarî vîlla û koşkê xo de bi hawayo rehet ciwîyenî, la ma feqîrî zî bîlasebeb mirenî.”
Karê ma zaf kewto
Nûrettîn Dago (65) ke her çiqas ke teqawit bîyo zî seba ke domanê ci wendekar î, mecbûr o ke bixebetîyo zî qisey kerd û va: “Ez sûke de kincanê zimistanî roşena. Ma aşme de 2 hezar TL kîra danî. No 6 aşmî yo ke karê ma zaf kewto. Seba ke her çî de vayî virazîyayo, şar nêeşkeno kincan biherîno.”Yahya Tatliyo ke sewlanê domanan roşeno zî qisey kerd û wina va: “Verê ma roj de 4-5 sewlî rotênê, la êdî ma nêeşkenî hende biroşî. Nika ma bi zorî debara xo kenî.”
DÎHABER / STENBOL